YeI va Afrika hamkorlikning «yangi imkoniyatlarini ochishga» qaror qildi

Yevropa Ittifoqi (YeI) va Afrika Ittifoqi (AI)ga a’zo davlatlar bu ikki qit’a o‘rtasida yanada yaqinroq hamkorlikni muhim, deb hisoblaydi. «Kelajakka nazar tashlar ekanmiz, hamkorligimizni yanada rivojlantirish va yangi imkoniyatlarni ochish niyatidamiz», — deyiladi Angola poytaxti Luandada bo‘lib o‘tgan ikki kunlik sammit yakunlariga bag‘ishlab seshanba, 25 noyabr kuni e’lon qilingan YeI va AIning qo‘shma deklaratsiyasida.

Hujjatda, ayniqsa, iqtisodiyot, savdo va investitsiyalar sohasidagi hamkorlikka alohida e’tibor qaratilgan. Shuningdek, deklaratsiyada tomonlarning Afrikada iqlim o‘zgarishiga qarshi kurash choralarini moliyalashtirish va qayta tiklanuvchi energiya manbalarini rivojlantirish bo‘yicha avvaldan olingan majburiyatlari esga olingan.

Har ikki tashkilot butun dunyo bo‘ylab mojarolarni hal etish zarurligini ta’kidladi. «Biz Ukrainada, bosib olingan Falastin hududida, Sudanda, Janubiy Sudanda, Kongo Demokratik Respublikasi (KDR)da, Sahelda, Somalida va dunyo bo‘ylab boshqa urushlar va mojarolarda adolatli, har tomonlama va barqaror tinchlikka bo‘lgan qat’iy qo‘llab-quvvatlovimizga yana bir bor ishora qilamiz», — deyiladi qo‘shma bayonotda.

Yevropa va Afrika Ittifoqi Sudanning Shimoliy Darfur viloyatidagi vaziyatdan «juda tashvishda» ekanini bildirdi. «Biz Al-Fashirda Yaqinda Tezkor reaksiya kuchlari (RSF) tomonidan shaharni egallab olishdan keyin sodir etilgan qatl etish holatlarini qoralaymiz va butun mamlakat bo‘ylab harbiy harakatlarni darhol to‘xtatish hamda gumanitar yordam uchun to‘siqsiz kirishni ta’minlashga chaqiramiz», — deyiladi deklaratsiyada.

Har ikki tomon demokratiya, samarali boshqaruv, qonun ustuvorligi, inson huquqlari va OAV erkinligiga sadoqatini tasdiqladi. Biroq dpa agentligi ta’kidlashicha, bayonotda ko‘plab Afrika davlatlarida siyosiy raqiblarga nisbatan munosabat, norozilik namoyishlarini kuch ishlatib tarqatish yoki inson huquqlari buzilishlari haqida hech narsa deyilmagan.