Intensiv bog‘dorlik uchun uch yillik dastur va yangi imtiyozlar joriy etiladi

Ma’lumki, ishning ko‘zini biladigan dehqonlar intensiv bog‘ yaratib, bir gektardan 50 ming dollargacha hosil olmoqda. Shundan kelib chiqib, bunday bog‘larni keskin ko‘paytirish va yerga munosabatni tubdan o‘zgartirish muhim ekani ta’kidlandi.

Ayni vaqtda respublikada 90 ming gektar eskirgan va kam hosilli bog‘-tokzorlar mavjud. Eski bog‘lardan olinayotgan hosil ko‘p hollarda gektariga 10 tonnaga ham yetmaydi. Shu bois, yangi bog‘ va tokzorlarni tashkil etish, mavjudlarini yangilash bo‘yicha uch yillik dastur qabul qilinadi.

Prezident tomonidan bog‘dorchilik xo‘jaliklari uchun quyidagi yangiliklar e’lon qilindi:

• Agrosanoatni rivojlantirish jamg‘armasidan intensiv bog‘ tashkil qilish uchun 7 yil muddatga, 3 yillik imtiyozli davr bilan, 14 foizli kredit beriladi;
• tadbirkorlik kompaniyasi tomonidan muzlatkichli ombor qurish uchun kredit foizining asosiy stavkadan oshgan 8 foizgacha qismi qoplab beriladi;
• Savdoni rivojlantirish kompaniyasi sabzavot eksportchilari va bog‘bonlarga qadoqlash xarajatining 50 foizini kompensatsiya qiladi;
• sertifikatlangan ko‘chat sotib olish xarajatining 50 foizi davlat budjeti hisobidan to‘lanadi;
• meva turiga qarab shpalerlar uchun fermerlarga har gektar uchun 20 ming so‘mdan 70 ming so‘mgacha subsidiya ajratiladi.

Shuningdek, paxta va g‘allada bo‘lgani kabi meva-sabzavot yo‘nalishidagi fermerlar uchun ham arzonlashtirilgan narxda mineral o‘g‘it va yoqilg‘i xarid qilish imkoniyati yaratilishi belgilandi.

Ushbu chora-tadbirlar orqali bog‘dorlik rivojini yangi bosqichga olib chiqish, ichki bozorni sifatli meva-sabzavot bilan ta’minlash va eksport hajmini oshirish ko‘zda tutilmoqda.