Chekka hududlarda notarius topish osonlashadi: suhbat asosida tayinlash joriy etiladi

Nizom loyihasiga ko‘ra, suhbatlar Adliya vazirligi huzuridagi Oliy malaka komissiyasi tomonidan o‘tkaziladi va jarayon audio hamda videoyozuv orqali qayd etib boriladi. Suhbat mazkur hududlarda davlat notariusi lavozimi ta’sis etilganda yoki bo‘sh o‘rin paydo bo‘lganida o‘tkazilishi belgilangan.

Tartibda suhbat e’loni qaysi hollarda berilishi ham ko‘rsatilgan: agar ro‘yxatdagi hududlarga berilgan yagona tanlov e’loniga birorta ham talabgor ishtirok etmasa yoki tanlovdan hech kim muvaffaqiyatli o‘ta olmasa, suhbat o‘tkazish uchun e’lon beriladi. E’lon “Inson va qonun” gazetasida va Adliya vazirligining rasmiy veb-saytida joylashtirilishi, zaruratga ko‘ra boshqa OAV va ijtimoiy tarmoqlarda ham tarqatilishi mumkin.

Suhbatda ishtirok etish uchun talabgor elektron shaklda ariza va so‘rovnoma, stajirovkadan o‘tganlik haqida ma’lumotnoma, notariuslikka talabgorlarni o‘qitish kursini muvaffaqiyatli tugatganlik sertifikatini taqdim etadi. Nizomda nazarda tutilmagan hujjatlarni talab qilish taqiqlanadi.

Suhbat natijasi komissiya a’zolari ovozi bilan belgilanadi: talabgor komissiya a’zolarining uchdan ikki qismi yoki undan ko‘p ovozini olgan taqdirda suhbatdan muvaffaqiyatli o‘tgan hisoblanadi. Suhbatdan o‘tgan talabgor komissiya majlisida notarius qasamyodini qabul qiladi va keyin belgilangan tartibda lavozimga tayinlanadi.

Shuningdek, chekka va talab past hududlarda kamida uch yil notariuslik faoliyatini amalga oshirgan notariusga komissiya xulosasi asosida o‘z xohishiga ko‘ra respublikaning boshqa hududida xususiy amaliyot bilan shug‘ullanishga ruxsat berish imkoniyati ham nazarda tutilgan.