Toshkent–London havo qatnovi kengaydi: haftasiga 5 ta reys

“Dunyo” AA xabar qilishicha, birinchi reys munosabati bilan Gatvik xalqaro aeroportida rasmiy tadbir o‘tkazildi. Unda Buyuk Britaniya fuqaro aviatsiyasi ma’muriyati, aeroport ma’muriyati, Qanot Sharq rahbariyati hamda mahalliy OAV vakillari ishtirok etdi.

Qayd etilishicha, elchixona tashabbusi bilan Buyuk Britaniyadan O‘zbekistonga sayyohlarni jalb etish, shuningdek, savdo-iqtisodiy va madaniy aloqalarni rivojlantirishga qaratilgan tadbirlar izchil amalga oshirilmoqda. Xususan, Qanot Sharq'ning Buyuk Britaniyaga muntazam qatnovlarni yo‘lga qo‘yishi uchun Birlashgan Qirollik fuqaro aviatsiyasi ma’muriyatining tegishli ruxsatnomalarini olishda amaliy ko‘mak ko‘rsatilgan.

Ma’lum bo‘lishicha, Qanot Sharq haftasiga ikki marta — dushanba va payshanba kunlari “Toshkent – London – Toshkent” yo‘nalishida parvozlarni amalga oshiradi. Ushbu reyslar Uzbekistan Airways AJ tomonidan mazkur yo‘nalishda haftasiga uch marta — seshanba, juma va yakshanba kunlari bajarilayotgan qatnovlarga qo‘shimcha bo‘lib, natijada umumiy reyslar soni haftasiga 5 taga yetgan.

Shuningdek, joriy yilning yanvar–noyabr oylarida Buyuk Britaniyadan O‘zbekistonga tashrif buyurgan sayyohlar soni 25 mingdan oshgan, bu ko‘rsatkich o‘tgan yilning mos davriga nisbatan 23 foizga ko‘tarilgani bildirildi.