Qirg‘izistonning sobiq prezidenti Almazbek Atambayev davlat mukofotlaridan mahrum etildi

Qirg‘iziston prezidenti Sadir Japarov sobiq prezident Almazbek Atambayevni davlat mukofotlaridan mahrum qilish to‘g‘risidagi farmonni imzoladi.

Hujjatga ko‘ra, sobiq prezident Qirg‘iziston Respublikasining oliy darajali «Qirg‘iz Respublikasining Bahodiri» ordeni, II darajali «Manas» ordeni, «Danaker» ordeni va «Dank» medalidan mahrum qilingan.

Atambayevni mukofotlash to‘g‘risida ilgari chiqarilgan barcha farmonlar (1999, 2007, 2011 va 2017 yillar) bekor qilindi.

Bosh prokuratura huzuridagi Sud ijrochilari xizmatiga «davlat mukofotlari va ularning hujjatlarini keyinchalik davlat mukofotlari fondiga topshirish uchun olib qo‘yish» topshirildi.

Farmon Bishkek Pervomayskiy tuman sudining 2025 yil 3 iyundagi hukmini ijro etish maqsadida imzolangan. Shunda Qo‘y-Tosh voqealari bo‘yicha ish doirasida Almazbek Atambayev sirtdan 11,5 yilga ozodlikdan mahrum etilgan, mol-mulki musodara qilingan va davlat mukofotlaridan mahrum etilgan edi. Sadir Japarov sud qarorini shafqatsiz deb atagan va agar Atambayevning vakillari hokimiyatga tegishli murojaat bilan chiqsa, uni afv etishga tayyorligini aytgan edi.

Almazbek Atambayev 2011-2017 yillarda Qirg‘izistonni boshqargan. 2019 yil avgust oyida Milliy xavfsizlik davlat qo‘mitasi uni Bishkek chekkasidagi Qo‘y-Toshdagi qarorgohida qo‘lga olishga uringan, biroq sobiq prezident tarafdorlari qurolli qarshilik ko‘rsatgan. To‘qnashuvlar chog‘ida maxsus xizmat xodimi halok bo‘ldi, 100 dan ortiq kishi jarohatlandi. Atambayev yakunda hibsga olindi.

Qo‘y-Tosh voqealari bo‘yicha sud jarayoni 2022 yilda boshlandi, keyinroq ishga korrupsiya bilan bog‘liq epizodlar qo‘shildi. 2023 yil fevral oyida Atambayev «chet elda davolanish uchun» hibsdan ozod qilindi: u Ispaniyaga uchib ketdi va Qirg‘izistonga qaytmadi.

2025 yil sentabr oyida sud ijrochilari uning oilasini Qo‘ytoshdagi uyidan majburan ko‘chirdi.