Qoʻshimcha funksionallar
-
Tungi ko‘rinish
O‘zbekistonliklarga Green Card uchun viza berish to‘xtatildi
30 dekabrdan boshlab AQShning O‘zbekistondagi elchixonasi Diversity Visa dasturi bo‘yicha vizalar berilishi to‘xtatilganini e’lon qildi. «DV dasturi murojaatchilari vizaga ariza topshirishlari va suhbatdan o‘tishlari mumkin, AQSh Davlat departamenti o‘z navbatida suhbat sanasini belgilashda davom etadi, biroq DV vizalari berilmaydi», deyiladi elchixona bayonotida.
Foto: REUTERS
AQShning O‘zbekistondagi elchixonasi 30 dekabrdan boshlab Diversity Visa dasturi bo‘yicha vizalar berilishi to‘xtatilganini e’lon qildi.
«Hozirdan e’tiboran, AQSh davlat departamenti turli millatga mansub immigrantlar vizasi (DV) dasturi bo‘yicha barcha vizalar berilishini to‘xtatib qo‘yadi. DV dasturi murojaatchilari vizaga ariza topshirishlari va suhbatdan o‘tishlari mumkin, AQSh Davlat departamenti o‘z navbatida suhbat sanasini belgilashda davom etadi, biroq DV vizalari berilmaydi.
DV dasturi bo‘yicha belgilangan suhbat sanalari boshqa sanaga ko‘chirilmaydi yoki bekor qilinmaydi. AQSh davlat departamenti murojaatchilarni xabardor qilib borishga intiladi hamda qo‘shimcha yangilik bo‘lishi bilanoq jamoatchilikka taqdim etadi», deyiladi elchixona xabarida.
Avvalroq, AQSh prezidenti Donald Tramp Green Card lotereya dasturini to‘xtatib turish bo‘yicha buyruq bergani xabar qilingandi.
Green Card – AQShda 1990 yildan beri chet elliklarga har yili tasodifiy ravishda 50 mingta yashash guvohnomasi tarqatiladigan dastur (Markaziy Amerika mamlakatlari uchun har yili yana besh ming tur ajratiladi). 2025 yil may oyida e’lon qilingan lotereya natijalariga ko‘ra, O‘zbekiston saralab olingan g‘oliblar bo‘yicha mamlakatlar ro‘yxatida yetakchilik qilgan – 5564 kishi. Keyingi o‘rinlarda Jazoir (5526) va Rossiya (5519) qayd etilgan.
