Zelenskiy va Mers Mar-a-Lago muzokaralari yakunlarini muhokama qildi

Ukraina prezidenti Volodimir Zelenskiy Germaniya kansleri Fridrix Mers bilan telefonda gaplashib, AQSh rahbari Donald Trampning Mar-a-Lago qarorgohida (Florida shtati) bo‘lib o‘tgan muzokaralar natijalarini muhokama qildi. Bu haqda dushanba kuni, 29 dekabrda Ukraina rahbari saytida xabar qilindi.

Nashrda qayd etilishicha, Zelenskiy Mersga “(muzokaralar davomida — tahr.) qanday asosiy urg‘ular qo‘yilgani va qaysi masalalar muhim bo‘lgani” haqida aytgan. Ukraina prezidenti, shuningdek, kanslerga maslahatlari va doimiy muvofiqlashtirib borgani uchun minnatdorchilik bildirgan.

Zelenskiy matbuot xizmati ma’lum qilishicha, u Mers bilan birga “Ukrainaning Rossiya rahbari rezidensiyasiga berilgan zarbalarga go‘yoki aloqadorligi haqidagi feyk”ni ham muhokama qilgan. “Volodimir Zelenskiyning aytishicha, Ukraina tinchlik bo‘lishi uchun qo‘lidan kelgan barcha ishni qilyapti, Rossiya esa urishish haqida ‘kreativlikni’ to‘xtatib, xavfsizlikni qanday tiklash haqida o‘ylashi kerak. Ukraina barcha takliflarni taqdim etgan”, — deyiladi xabarda.

Ukraina prezidentining Mers bilan suhbatidan bir necha soat oldin Ukraina Milliy xavfsizlik va mudofaa kengashi kotibi Rustem Umerov X tarmog‘ida Zelenskiy bilan AQSh prezidentining maxsus vakili Stiven Uitkoff o‘rtasida telefon suhbati bo‘lganini yozgan.

“Asosiy nuqta — keyingi aloqalar va navbatdagi qadamlarni muvofiqlashtirish. Ish juda shiddatli va mazmunli: biz deyarli har kuni maslahatlashuvlarni davom ettiryapmiz va hujjatlar bandi ustida ishlayapmiz”, — deb yozdi u. Umerov, shuningdek, “Yevropadagi milliy xavfsizlik bo‘yicha maslahatchilar bilan doimiy aloqa” va “yaqin kelajakda navbatdagi uchrashuvlar” bo‘yicha kelishuvlar borligini qayd etgan.

Oq uy 29 dekabr kuni Rossiya va AQSh prezidentlari Vladimir Putin hamda Donald Tramp o‘rtasida ham telefon suhbati bo‘lib o‘tganini ma’lum qildi. AQSh tomoni bu suhbatni “ijobiy” deb atagan.

Putin yordamchisi Yuriy Ushakovning aytishicha, Tramp Rossiya rahbari bilan suhbatda RF prezidentining davlat rezidensiyasiga dronlar (uchuvchisiz apparatlar) bilan hujum qilingani haqidagi xabardan “shokda” qolgani va “g‘azablangani”ni aytgan. Shuningdek, u, da’vo qilinishicha, “hujumga urinish” muhokamasi vaqtida Oq uy “Kiyevga ‘Tomagavk’ bermaganini” aytgan. AQSh hokimiyati bu bayonotlarni hozircha izohlamagan.