Raqobat qo‘mitasi gaz narxlarini asossiz oshirish alomatlari bo‘yicha ish qo‘zg‘atdi

Raqobat qo‘mitasi ma’lum qilishicha, o‘tgan yilning noyabr–dekabr oylarida bozor ishtirokchilariga profilaktik maqsadlarda ogohlantirishlar yuborilib, metan gaziga kiritilgan vaqtinchalik cheklovlar holatidan foydalangan holda suyultirilgan gaz narxlarini asossiz oshirmaslik talab qilingan edi.

Shunga qaramasdan, ayrim xo‘jalik yurituvchi sub’yektlar tomonidan adolatli bozor prinsiplariga zid ravishda narxlarning asossiz oshirilishiga sabab bo‘luvchi manipulyatsiya va muvofiqlashtirilgan harakatlar alomatlari kuzatilayotgani qayd etildi.

Aniqlangan holatlar bo‘yicha Qo‘mita tomonidan qonunbuzilishi alomatlari yuzasidan ish qo‘zg‘atish ishlari boshlangan.

Bundan tashqari, birja savdolarida narxlarni barqarorlashtirish maqsadida “korreksiyalashtiruvchi” choralar ko‘rilmoqda. Xususan, bozor ishtirokchilariga birja savdolariga mahsulotlarni to‘liq hajmda va bir maromda chiqarish bo‘yicha ko‘rsatmalar yuborilgan.