Afg‘onlarning yarmidan ko‘pining Germaniyaga kirish ruxsatnomalari bekor qilindi

Pokistonda yashayotgan va avvalgi Germaniya hukumati tomonidan GFRga kirish va’da qilingan 2308 nafar afg‘ondan deyarli har ikkinchisiga kirish rad etilgan. Bu haqda Germaniya hukumatining So‘l partiya deputatlarining parlament so‘roviga javobida aytiladi, deb xabar berdi 20 yanvar, seshanba kuni Neue Osnabrücker Zeitung gazetasi.

Nashr ma’lumotlariga ko‘ra, 2025 yil may oyida hozirgi federal hukumat ish boshlagandan keyin Germaniyaga 788 nafar afg‘on yetib kelgan, yana taxminan 410 kishi esa Pokistondan chiqib ketish jarayonida.

XDI/XSI konservativ bloki va Germaniya Sotsial-demokratik partiyasi (GSDP)dan iborat yangi hukumat hokimiyatga kelgach, Afg‘onistondan keluvchilarni qabul qilish dasturlarini to‘xtatgan. Xabar qilinishicha, so‘nggi haftalarda Pokistondan kirish ruxsatiga ega bo‘lgan bir necha yuz nafar afg‘on Germaniyaga uchib kelgan, ammo ular xavfsizlik tekshiruvidan o‘tishi kerak bo‘lgan. Shu bilan birga, yuzlab afg‘onlarga, aksincha, kirish butunlay rad etilgan.

So‘l partiyaning qochqinlar siyosati bo‘yicha vakili Klara Byunger hukumat harakatlarini keskin tanqid qildi.

“Germaniya kirish va’da qilingan va xavf ostida bo‘lgan afg‘onlarning yarmini shunchaki tashlab qo‘yish — mas’uliyatsizlik, nomaqbul va axloqan yo‘l qo‘yib bo‘lmaydigan holat”, — dedi u Neue Osnabrücker Zeitung nashriga.

Byunger ta’kidlashicha, bu afg‘onlar bir necha yil davomida Germaniya ko‘magida Pokistonda turar joy va parvarish bilan ta’minlangan, Germaniyaga ko‘chib o‘tishni kutib yashagan. Uning fikricha, Berlin bu odamlar oldidagi javobgarlikdan voz kechib, ularni “insonparvarlikka zid va ayollarga nisbatan tajovuzkor rejim ixtiyoriga tashlab qo‘yishga haqli emas”.