Nemislarning uchdan ikki qismi federal yerlar soni qisqarishiga qarshi

Germaniya aholisining mutlaq ko‘pchiligi federal yerlarni birlashtirish va ular sonini qisqartirishga qarshi chiqmoqda. Seshanba, 20 yanvar kuni e’lon qilingan ijtimoiy so‘rov natijalariga ko‘ra, Bavariya bosh vaziri Markus Zyoder tomonidan ilgari surilgan bu g‘oyaga respondentlarning 64 foizi qarshi ekanini bildirgan. So‘rovda qatnashganlarning 30 foizi tashabbusni qo‘llab-quvvatlagan, 6 foizi esa javob berishdan tiyilgan.

Zyoder o‘z taklifini shunday izohladi: Bavariya hududlar o‘rtasida moliyaviy qayta taqsimlash tizimida eng katta yukni ko‘tarmoqda. Faqat o‘tgan yilning birinchi olti oyidayoq Bavariya taxminan 6,7 milliard yevro hissa qo‘shgan. Bavariyadan tashqari Germaniyada faqat uchta federal yer — Baden-Vyurtemberg, Gessen va Hamburg donor hududlar hisoblanadi.

Shunga qaramay, Bavariyaning o‘zida ham aholining 67 foizi o‘z bosh vazirining g‘oyasini qo‘llab-quvvatlamaydi. Shuningdek, Germaniyaning eng ko‘p aholiga ega boshqa yerlarida ham ko‘pchilik qarshi chiqdi: Shimoliy Reyn – Vestfaliyada 61 foiz, Baden-Vyurtembergda esa 69 foiz aholi bu taklifni ma’qullamaydi.

So‘rov natijalariga ko‘ra, G‘arbiy va Sharqiy Germaniya yerlari o‘rtasida ham katta farq kuzatilmagan: g‘oyaga qarshi chiqqanlar mos ravishda 64 va 65 foizni tashkil etgan.

Federal yerlarni birlashtirish tarafdorlari eng ko‘p XDI/XSI konservativ bloki saylovchilari orasida qayd etilgan (38 foiz — “tarafdor”, 58 foiz — “qarshi”). Eng ko‘p qarshi chiquvchilar esa Germaniya Sotsial-demokratik partiyasi tarafdorlari bo‘lgan (22 foiz — “tarafdor”, 71 foiz — “qarshi”).

Mazkur reprezentativ so‘rov jamoatchilik fikrini o‘rganish bilan shug‘ullanuvchi Forsa instituti tomonidan Stern jurnali va RTL telekanali buyurtmasi asosida 2026 yil 15–16 yanvar kunlari o‘tkazilgan.