Germaniyada minglab kishi kurdlarni qo‘llab-quvvatlash aksiyalariga chiqdi

Suriya shimolida vaziyat keskinlashayotgani fonida Germaniyaning bir nechta shaharlarida kurdlarni qo‘llab-quvvatlashga bag‘ishlangan namoyishlar o‘tkazildi. Ularda minglab odam qatnashdi. Eng yirik aksiyalar seshanba, 20 yanvar kuni kechqurun Dortmund, Frankfurt-Mayn, Shtutgart, Hannover va Bremen shaharlarida bo‘lib o‘tdi.

Shtutgart va Hannoverda yuzini niqob bilan berkitgan namoyishchilar huquqni muhofaza qiluvchi idoralar bilan to‘qnashuvga kirishdi: ular politsiya tomon shishalar va pirotexnika otgan, politsiya esa javoban qalampirli sprey qo‘llagan.

Hannoverda, politsiya baholashicha, ko‘chalarga kamida 1600 nafar namoyishchi chiqqan. Ikki soatdan keyin aksiya “noto‘g‘ri/noma’lum tartibdagi xulq-atvor” sabab tarqatib yuborilgan. Politsiya xodimlariga hujum qilgani uchun ikki kishi hibsga olingan.

Dortmund markazidagi namoyish “Begunoh odamlar, tinch aholi va bolalar o‘ldirilishiga qarshi” degan shior ostida o‘tgan. Unda ishtirok etish uchun 400 kishi ro‘yxatdan o‘tkazilgan, ammo politsiya ma’lumotiga ko‘ra, aksiyaning eng qizg‘in paytida qatnashchilar soni e’lon qilinganidan 10 barobar ko‘p bo‘lgan. Marsh, asosan, tinch o‘tgan, lekin uning chetroq hududlarida mayda to‘qnashuvlar bo‘lgan.

Frankfurtda namoyishda taxminan 5000 kishi, Bremenda esa 2000 atrofida odam qatnashgan.

Suriyada esa hukumat qo‘shinlari va ularning ittifoqchilari bir necha kundan beri kurdlarning Suriya demokratik kuchlari (SDF) nazorat qiladigan hududlar tomon ilgarilamoqda. Janglar qayta boshlanganidan keyin tomonlar 20 yanvar kechqurun to‘rt kunlik muddatga o‘t ochishni to‘xtatish bo‘yicha kelishgan.