Telegram orqali giyohvandlik vositalari savdosi fosh etildi

Qo‘qon shahrida o‘tkazilgan tezkor-profilaktik tadbirda internet ijtimoiy tarmoqlari orqali giyohvandlik vositalarini sotish bilan shug‘ullangan shaxslar faoliyati aniqlandi. Holat yuzasidan jinoyat ishi qo‘zg‘atildi.

Foto: Prokuratura departamenti

Bosh prokuratura huzuridagi Departamentning Qo‘qon shahri bo‘limi xodimlari tomonidan o‘tkazilgan “Xavfsiz va sog‘lom yurt” keng qamrovli tezkor-profilaktik tadbiri davomida Telegram messenjerida kanal-bot tashkil etgan shaxslar fosh etildi.

Ma’lum qilinishicha, ushbu shaxslar kuchli ta’sir qiluvchi, psixotrop va giyohvandlik vositalarini onlayn tarzda sotish bilan shug‘ullanib kelgan. Ular fuqaroga tarkibida giyohvandlik moddalari bo‘lgan 0,92 gramm “Aromo klubnika” nomli vositani 10,1 mln so‘mga sotishga kelishgan.

Tezkor tadbir jarayonida pul mablag‘i boshqa fuqaro nomidagi plastik kartaga o‘tkazilgandan so‘ng, giyohvandlik vositalarini Toshkent shahri, Mirzo Ulug‘bek tumani, Alisherobod mahallasi hududidagi yerga ko‘mib qo‘ygani aniqlangan.

Mazkur holat yuzasidan Jinoyat kodeksining 273-moddasi bilan jinoyat ishi qo‘zg‘atilib, materiallar tergovga tegishliligi bo‘yicha yuborilgan.