Pavel Durov ushbu bayonotni Telegram ilovasi 4-avgust kuni tungi soatlarda App Storeʼdan vaqtincha olib tashlanib, bir necha soatdan keyin yana qayta tiklanganidan so‘ng e’lon qildi.
Uning so‘zlariga ko‘ra, Appleʼning qaroriga Telegram foydalanuvchisining ommaviy chatda «noqonuniy pornografik kontent» mavjudligi haqidagi shikoyati sabab bo‘lgan. Biroq Durovning ta’kidlashicha, shikoyat qilgan shaxsning o‘zi aynan shu kontentni joylashtirgan.
Telegram asoschisining aytishicha, firibgar eski xabarni tahrirlash imkoniyatidan foydalanib, sun’iy intellekt yordamida tayyorlangan noqonuniy materialni xabar ichiga joylashtirgan. Natijada mazkur kontent guruh ishtirokchilariga ko‘rinmay qolgan va ular uni o‘z vaqtida aniqlab, shikoyat qilish imkoniga ega bo‘lmagan.
Durovga ko‘ra, bu harakatning asosiy maqsadi guruh egalarini shantaj qilish bo‘lgan. Uning ta’kidlashicha, jinoyatchilar avtomatlashtirilgan akkauntlar - botlar orqali ommaviy guruhlarga noqonuniy material joylashtirib, keyin esa Appleʼga murojaat qilib, ushbu guruhlarni yoptirish bilan tahdid qiladi. Agar guruh egalari tovlamachilar talab qilgan mablag‘ni to‘lashdan bosh torsa, ularning hamjamiyatini o‘chirtirishga harakat qilinadi.
Telegram asoschisi Apple mazkur qarorni qabul qilishdan avval messenjyer ma’muriyati bilan bog‘lanmaganidan afsus bildirgan. Uning fikricha, bunday holat har qanday ilova ishlab chiqaruvchisi bilan ham sodir bo‘lishi mumkin.
Avvalroq Apple vakili Telegramʼning vaqtincha o‘chirilishiga izoh berib, tekshiruv davomida bolalarga nisbatan jinsiy zo‘ravonlikka oid materiallar aniqlanganini ma’lum qilgan edi. Kompaniya bayonotiga ko‘ra, ushbu kontent platformadan o‘chirilgan va uni joylashtirgan foydalanuvchi bloklanganidan keyin Telegram yana App Storeʼga qaytarilgan.
Pavel Durov esa noqonuniy pornografik materiallar Telegram uchun tizimli muammo emasligini ta’kidlab, platformadagi moderatsiya tizimi samarali ishlayotganini bildirdi.
