Toshkentda O‘zbekiston–Germaniya siyosiy maslahatlashuvlari o‘tkazildi

Toshkentda O‘zbekiston va Germaniya tashqi ishlar vazirliklari o‘rtasida siyosiy maslahatlashuvlarning 20-raundi bo‘lib o‘tdi, deya xabar berdi “Dunyo” AA.

TIV ma’lumotiga ko‘ra, O‘zbekiston delegatsiyasiga tashqi ishlar vazirining o‘rinbosari Muzaffar Madrahimov, Germaniya tomoniga esa Germaniya tashqi ishlar vazirligining Sharqiy Yevropa, Kavkaz va Markaziy Osiyo mamlakatlari bo‘yicha vakili Niklas Vagner boshchilik qildi.

Muzokaralarda oliy darajada erishilgan kelishuvlarni o‘z vaqtida va puxta amalga oshirish mexanizmlari, siyosiy-diplomatik munosabatlarni yanada rivojlantirish masalalari ko‘rib chiqildi. Shuningdek, savdo-investitsiya sohasidagi hamkorlikni faollashtirish, madaniy-gumanitar aloqalarni kengaytirish hamda xalqaro tashkilotlar doirasida muloqotni chuqurlashtirishning joriy holati va istiqbollari yuzasidan batafsil fikr almashildi.

Siyosiy maslahatlashuv yakunlariga ko‘ra, ikki tomonlama hamkorlikni yanada chuqurlashtirish va erishilgan kelishuvlarni sifatli bajarish zarurati ta’kidlandi.