2025 yilning eng korrupsiyaviy tashkilotlari e’lon qilindi

6 fevral kuni Korrupsiyaga qarshi kurashish agentligida o‘tgan jamoatchilik kengashi yig‘ilishida 2025 yilda qancha korrupsion jinoyat kuzatilgani va ularning sohalar kesimidagi ulushi ma’lum qilindi.

Qayd etilishicha, o‘tgan yilda 6 373 nafar shaxs tomonidan 5 222 ta jinoyat sodir etilgan. 2024 yilda bu raqam 5 716 tani tashkil etgan. Hududlar kesimida korrupsiyaviy ishlar Farg‘ona va Surxondaryo viloyatlarida ko‘paygan, Xorazm, Qashqadaryo, Toshkent hamda Samarqand viloyatlarida esa kamaygan.

2025 yilning eng ko‘p korrupsiyaga yo‘l qo‘ygan tashkilotlari deb Maktabgacha va maktab ta’limi, Sog‘liqni saqlash vazirliklari hamda mahalliy hokimliklar topilgan. 

“Tuman-shahar darajasida korrupsion jinoyatlar bo‘yicha 12 nafar hokim javobgarlikka tortilgan. [Jinoyatlar] 300 dan ko‘p mahalliy hokimliklarga to‘g‘ri keladi va ularning ham aksariyat, 80-90 foizdan ko‘pi hokim yordamchilari bilan bog‘liq. Va biz buni tahlil qildik, o‘rgandik. Bu yerda juda ham ko‘p korrupsiyaviy omillar bo‘lgani uchun ularda mana shu jinoyatlar ko‘p bo‘lgan.

Va biz hozir o‘sha subsidiya berish, imtiyozli kreditlar ajratishni inson omilisiz, ya’ni hokim yordamchisiga bog‘liq bo‘lmagan holda, mahalla yettiligi, kollegial qaror qabul qilish va inson omilisiz raqamlashtirish choralarini ko‘rdik. O‘ylaymanki, xuddi autsorsingni aytganimdek, 2026 yilda hokim yordamchilari tomonidan sodir etiladigan korrupsiyaviy jinoyatlar salmog‘i keskin kamayishiga erishiladi”, – dedi Burhonov.

Qo‘shimcha qilinishicha, hokimliklar kesimida eng ko‘p korrupsiyaviy jinoyatlarni Toshkent shahri – 612 ta, Toshkent viloyati – 584 ta, Farg‘ona viloyati – 455 ta sodir etgan.