Dori vositalari samaradorligini baholash bo‘yicha ilmiy komissiya tuziladi

“Dori vositalarini davlat ro‘yxatidan o‘tkazish jarayonida samaradorligi o‘rganilgan, lekin isbot topmagan hamda samaradorligi o‘rganilmagan dori vositalarini aniqlash tartibi to‘g‘risida”gi nizom loyihasiga ko‘ra, dori vositalarining samaradorligi Sog‘liqni saqlash vazirligi huzuridagi “Farmatsevtika mahsulotlari xavfsizligi markazi” davlat muassasasi tomonidan davlat ro‘yxatidan o‘tkazishning ixtisoslashtirilgan ekspertizasi jarayonida o‘rganiladi.

Loyihada dori vositalarining dalillarga asoslangan tibbiyotga muvofiqligi Sog‘liqni saqlash vazirligining soha yo‘nalishlari bo‘yicha kamida 40 nafar mustaqil ekspertdan tashkil topgan Ilmiy komissiyani jalb qilgan holda aniqlanishi nazarda tutilgan.

Mustaqil ekspert sifatida tibbiyot yoki farmatsevtika fanlari bo‘yicha DSc yoki PhD ilmiy darajasiga ega, mutaxassisligi bo‘yicha kamida 10 yillik ish stajiga ega, shu jumladan ilmiy-amaliy tibbiyot markazlari yoki ilmiy-tadqiqot (klinik) muassasalarida amalda mehnat faoliyatini olib borayotgan hamda davlat tilida rasmiy hujjat yuritish salohiyatiga ega shaxslar jalb etilishi mumkin.

Nizom loyihasiga ko‘ra, Ilmiy komissiya dori vositalarini uch toifaga ajratish bo‘yicha qaror qabul qiladi: samaradorligi o‘rganilgan va isbot topgan, samaradorligi o‘rganilgan, lekin isbot topmagan, hamda samaradorligi o‘rganilmagan dori vositalari.

Qabul qilingan qarorlar asosida vakolatli organ samaradorligi isbotlangan preparatlarni davlat ro‘yxatidan o‘tkazishi, isbot topmaganlari bo‘yicha qayta baholash (ekspertiza) o‘tkazishi, samaradorligi o‘rganilmagan dori vositalari uchun esa davlat ro‘yxatidan o‘tkazishni rad etishi mumkin.

Shuningdek, Ilmiy komissiya qarori bilan shakllangan ro‘yxatlar qaror qabul qilingan kundan e’tiboran 1 ish kuni ichida vakolatli organning rasmiy veb-saytida e’lon qilinishi qayd etilgan.