Bino va inshootlarni texnik ko‘rikdan o‘tkazish ishlari narxini baholash tartibi belgilanmoqda

Hujjatga ko‘ra, bino va inshootlarning texnik holatini o‘rganish va laboratoriya sinov ishlari qiymatini hisoblashning yagona mexanizmini joriy etish nazarda tutilmoqda. Ushbu ishlar buyurtmachi bilan tuzilgan shartnoma asosida va qonunchilikda belgilangan hollarda amalga oshiriladi.

Loyihaga muvofiq, texnik holatni o‘rganish ishlari vizual va instrumental ko‘rik orqali olib boriladi. Bunda bino va inshootlarning loyiha hujjatlariga mosligi, konstruktiv yechimlari, o‘lchamlari, yuk ko‘taruvchi elementlari, antiseysmik choralari, shikastlanish va deformatsiya holatlari aniqlanadi. Shuningdek, o‘lchov ishlari o‘tkazilib, olingan namunalar laboratoriyada sinovdan o‘tkaziladi hamda natijalar asosida obektning texnik holati baholanadi.

Texnik ko‘rik ishlari qiymati bino yoki inshoot hajmi, ishlarni bajarishga sarflanadigan vaqt, tegishli koeffitsiyentlar va bir soatlik ish qiymati asosida hisoblanadi. Laboratoriya sinovlari narxi esa ish turi, sinov o‘tkazishga ketadigan o‘rtacha vaqt va laboratoriya ishlarining soatlik qiymatidan kelib chiqqan holda aniqlanadi.

Shuningdek, hududiy nazorat qilish inspeksiyalari mazkur ishlar bo‘yicha narxlar kalkulyatsiyasini ishlab chiqishi va tasdiqlashi belgilanmoqda.

Nizom talablari buzilgan taqdirda aybdor shaxslar qonunchilikka muvofiq javobgar bo‘lishi nazarda tutilgan.