Xitoyda aholining semizligi tufayli «shakar solig‘i»ni joriy etish taklif qilindi

Xitoy siyosatchilari tarkibida shakar miqdori yuqori bo‘lgan ichimliklarga qo‘shimcha soliq joriy etishni muhokama qilmoqda. Bunday soliq nafaqat budjet masalalarini hal qilishga yordam beradi, balki shakarni ortiqcha iste’mol qilish bilan bog‘liq aholi salomatligi uchun salbiy oqibatlarni kamaytiradi. Bu haqda muhokama jarayonidan xabardor manbalarga tayanib, Financial Times xabar berdi.

Nashrning ta’kidlashicha, Xitoy shakarli ichimliklarga milliy soliq solinmaydigan kam sonli yirik iqtisodiyotlardan biri bo‘lib qolmoqda, 116 dan ortiq mamlakat allaqachon bunday choralarni joriy etgan.

Ko‘rib chiqilayotgan shirin ichimliklar solig‘i nafaqat budjetga daromad keltirishi, balki shakarni ko‘p iste’mol qilish bilan bog‘liq bo‘lgan semizlik, diabet va boshqa kasalliklar xavfini kamaytirish orqali iste’molga ta’sir qilishi mumkin.

Pekin universiteti va Xitoy ijtimoiy fanlar akademiyasining tadqiqotiga ko‘ra, 20 foizlik soliq o‘n minglab erta o‘limning oldini olishi mumkin.

2025 yil iyul oyida JSST barcha mamlakatlarni 2035 yilga borib narxlarni 50 foizga oshirish uchun shirin ichimliklar chakana narxining kamida 20 foizi miqdorida soliq joriy etishga chaqirdi.

Xitoyda 2025 yilda e’lon qilingan ovqatlanish bo‘yicha so‘nggi tavsiyalarga ko‘ra, 2030 yilga borib, shakarning o‘rtacha kunlik iste’moli kishi boshiga 25 grammgacha kamaytirilishi kerak. Xitoy rasmiylarining hisob-kitoblariga ko‘ra, hozir o‘rtacha kunlik iste’mol bir kishi uchun 30 grammni tashkil qiladi.

The Washington Post ma’lumotlariga ko‘ra, 2025 yilda Xitoyning katta yoshli aholisi yarmidan ko‘pi ortiqcha vaznga ega bo‘lgan.