Agentlik press-reliziga ko‘ra, «O‘zbekinvest» O‘zbekistonda moliyaviy barqarorlik bo‘yicha «Ba1» darajasidagi reytingga ega bo‘lgan yagona moliya instituti hisoblanadi.
Moody’s Ratings ma’lum qilishicha, kompaniyaga berilgan moliyaviy barqarorlik reytingi (Insurance Financial Strength Rating – IFSR) uning O‘zbekiston sug‘urta bozoridagi mustahkam mavqeyi, yuqori kapital zaxirasi hamda aktivlarining yuqori sifatiga asoslangan.
Shuningdek, agentlik tahlilchilari kompaniyaning yuqori sifatli yirik investitsiya portfeli va xalqaro qayta sug‘urta faoliyatidan olinayotgan sug‘urta mukofotlari ulushining yuqoriligini ham alohida qayd etdi.
Kompaniyaning xalqaro reytingi «Ba1» darajasiga ko‘tarilgani uning yuqori kreditga layoqatliligini tasdiqlaydi. Bu, shuningdek, anderrayting va investitsiya faoliyatida erishilgan yuqori natijalar bilan ham mustahkamlangan:
Global ishtirok: qayta sug‘urta operatsiyalari geografiyasi 135 ta davlatni qamrab olgan bo‘lib, xorijdan olingan daromadlar kompaniyaning jami sug‘urta tushumlarining 50 foizini yoki 32,5 mln AQSh dollarini tashkil etdi.
Eksportni qo‘llab-quvvatlash: milliy eksportchilarga taqdim etilgan sug‘urta himoyasi hajmi 2,3 mlrd dollarga yetdi va mamlakatning jami xomashyo bo‘lmagan eksportining 41 foizini qamrab oldi.
Biznes rivojlanishi: yalpi sug‘urta mukofotlari yig‘imi o‘tgan yilning shu davriga nisbatan 132 foizga oshdi. Shu bilan birga, so‘nggi 9 yilda sug‘urta mukofotlarining umumiy hajmi 41 mlrd so‘mdan 935 mlrd so‘mgacha, ya’ni 22 barobardan ziyod o‘sdi.
Korporativ portfel: korporativ segmentda 398 mlrd so‘m sug‘urta mukofotlari yig‘ildi, shundan 42 mlrd so‘mi investitsiya loyihalarini sug‘urtalash hissasiga to‘g‘ri keladi.
Bozordagi mavqeyi: kompaniya majburiy sug‘urta bozorida 20 foizlik ulush bilan yetakchilik maqomini saqlab qolmoqda. Jismoniy shaxslar segmentida sug‘urta mukofotlari so‘nggi 9 yilda 4,9 mlrd so‘mdan 140 mlrd so‘mgacha, ya’ni 29 barobarga oshdi. Kompaniya mijozlari soni esa 2017 yildagi 70 ming nafardan 2026 yilda 1,1 million nafargacha, ya’ni 15 barobarga ko‘paydi.
«O‘zbekinvest» kompaniyasining xalqaro reytingi «Ba1» darajasiga ko‘tarilgani uning xalqaro faoliyati izchil kengayib borayotgani, biznesi barqaror sur’atlarda rivojlanayotgani hamda xalqaro va mahalliy mijozlar hamda hamkorlar uchun ishonchli sherik sifatida o‘z mavqeini yanada mustahkamlayotganini tasdiqlaydi.
Koll-markaz: (+998) 71−207−60−00, 1160
