Toshkent davlat tibbiyot universiteti dunyo universitetlari TOP-1000 ligida

Universitet bu natijaga qanday erishdi?
Joriy yil 24 iyun kuni Indoneziyaning Jakarta shahrida bo‘lib o‘tgan Global Sustainable Development Congress–2026 forumida Times Higher Education (THE) xalqaro reyting agentligi o‘zining Impact Rankings–2026 natijalarini e’lon qildi.

Unga ko‘ra, Toshkent davlat tibbiyot universiteti 601–800-o‘rinlar guruhidan joy olib, dunyoning top-1000 universiteti qatoriga kirdi. Reyting universitetlarning Birlashgan Millatlar Tashkiloti belgilagan 17 ta Barqaror rivojlanish maqsadini amalga oshirishga qo‘shayotgan hissasi asosida shakllantiriladi. Bunda ta’lim sifati, ilmiy tadqiqotlar, sog‘liqni saqlash, innovatsiyalar, ijtimoiy mas’uliyat, atrof-muhitga munosabat va xalqaro hamkorlik kabi qator mezonlar hisobga olinadi.

Toshkent davlat tibbiyot universiteti uchun eng muhim natijalardan biri «Sog‘liq va farovonlik» (SDG 3) yo‘nalishida qayd etildi. Universitet ushbu mezon bo‘yicha dunyoda 81-o‘rinni, mamlakatimizda esa birinchi o‘rinni egalladi. Bu ko‘rsatkich tibbiy ta’lim bilan birga klinik faoliyat, ilmiy tadqiqotlar, profilaktika dasturlari va aholi salomatligini mustahkamlashga qaratilgan tashabbuslarni ham qamrab oladi.

Bu natija universitet uchun faqat navbatdagi reyting emas. U so‘nggi yillarda ta’lim mazmunini yangilash, ilmiy faoliyatni kuchaytirish, klinik amaliyotni takomillashtirish va xalqaro hamkorlikni kengaytirish yo‘lida amalga oshirilgan o‘zgarishlarning xalqaro mezonlar asosida baholanganini anglatadi.

Xalqaro reytingga olib kelgan o‘zgarishlar

Toshkent davlat tibbiyot universiteti bugun Markaziy Osiyodagi yirik tibbiy ta’lim muassasalaridan biri hisoblanadi. Universitetda 4,5 mingga yaqin professor-o‘qituvchi 32 mingdan ziyod talabaga bakalavriat, magistratura, klinik ordinatura va doktorantura bosqichlarida ta’lim beradi.

So‘nggi yillarda universitetda ta’lim tizimi tubdan qayta ko‘rib chiqildi. Buyuk Britaniya, Germaniya, Italiya, Litva, Turkiya, Janubiy Koreya va Xitoy kabi davlatlar mutaxassislari ishtirokida Xalqaro ekspertlar kengashi tashkil etildi. Ular ishtirokida o‘quv rejalari va ta’lim dasturlari qayta ishlanib, ayrim yo‘nalishlar dunyoning yetakchi universitetlari tajribasi asosida yangilandi.

Shu bilan birga, kompetensiyaga asoslangan ta’lim modelini joriy etishga alohida e’tibor qaratildi. Germaniyaning GIZ tashkiloti, yetakchi xorijiy universitetlar va boshqa hamkorlar bilan birgalikda yangi o‘quv dasturlari ishlab chiqildi.

Universitet infratuzilmasi ham bosqichma-bosqich modernizatsiya qilindi. Auditoriyalar, laboratoriyalar va simulyatsiya markazlari zamonaviy tibbiy uskunalar, robot-simulyatorlar, fantomlar hamda raqamli texnologiyalar bilan jihozlandi. Ta’lim jarayoniga virtual laboratoriyalar, VR va AR texnologiyalari, sun’iy intellekt elementlari hamda interaktiv platformalar kirib keldi.

Ta’lim jarayonida dual yondashuv kengaytirildi. Endi talabalar nazariy bilimlarni auditoriyalarda o‘zlashtirsa, amaliy ko‘nikmalarni universitet klinikalari, respublika ixtisoslashtirilgan tibbiyot markazlari, ko‘p tarmoqli shifoxonalar, poliklinikalar va xususiy klinikalarda mustahkamlamoqda. Bu esa bitiruvchilarning kasbiy tayyorgarligi va mehnat bozoriga moslashuvini oshirishga xizmat qilmoqda.

Universitetning infratuzilmasi

Universitetning infratuzilmasi zamonaviy va unikal bo‘lib, o‘z ichiga 3 ta kampus (bosh kampus, pediatriya va stomatologiya kampuslari), 3 ta ko‘p tarmoqli universitet klinikalari, 3 ta akademik litsey, 2 ta mintaqaviy filial, eng so‘nggi rusumdagi robot-simulyatorlar, fantomlar, asbob-uskunalar va zarur o‘quv jihozlari bilan jihozlangan O‘quv-simulyatsiya markazlari, axborot resurs markazlari, 10 ta markaz, 11 ta o‘quv binolari, 14 ta talabalar turar joylari, 13 ta fakultet va 111 ta kafedrani olgan.

Angliya, Germaniya, Litva, Italiya, Koreya, Turkiya, Xitoy kabi mamlakatlardan 10 dan ortiq xorijlik ekspertlardan iborat Xalqaro ekspertlar kengashi ta’sis etilib, universitetning tashkiliy tuzilmasi, mavjud o‘quv dasturlari va o‘quv rejalarini shakllantirishda ularning ilg‘or xorijiy tajribaga asoslangan takliflari, xulosalari va taqrizlari olinib, universitetdagi ta’lim tizimi qayta ko‘rib chiqildi. Bunda 6 ta bakalavriat ta’lim yo‘nalishining o‘quv rejalari va malaka talablari xalqaro standartlarga moslashtirildi, o‘quv dasturlar TOP-300 talikka kirgan OTMlarning o‘quv dasturlari asosida takomillashtirildi. GIZ (Germaniya), Lyubek universiteti (Germaniya) va boshqa xorijiy hamkorlar ishtirokida xorijiy ilg‘or tajriba asosida kompetensiyaga yo‘naltirilgan dasturlar ishlab chiqildi.

Universitet faoliyatini rivojlantirish uchun moddiy-texnik bazani mustahkamlash maqsadida barcha o‘quv auditoriyalari, ma’ruza zallari hamda ilmiy va o‘quv laboratoriyalari to‘liq modernizatsiya qilindi, zamonaviy tibbiy asbob-uskunalar, laboratoriya reaktivlari, fantom va mulyajlar bilan jihozlash orqali ta’lim jarayoni va ilmiy izlanishlarni chuqurlashtirish imkoniyati yaratildi, laboratoriyalar faoliyatini samarali yo‘lga qo‘yish uchun metodik yo‘riqnomalar ishlab chiqildi va faoliyatga joriy qilindi.

Ta’lim jarayoni tubdan transformatsiya qilindi: kredit-modul tizimi, zamonaviy pedagogik texnologiyalar, virtual laboratoriyalar, VR/AR texnologiyalari, robot-simulyatorlar va sun’iy intellektga asoslangan interaktiv platformalar joriy etildi.

Universitetda dual ta’lim tizimi joriy qilinib, talabalar nazariy bilimni auditoriyada, amaliyotga oid bilim va ko‘nikmalarini esa bevosita universitetning klinik bazalari hisoblangan tibbiyot muassasalarida o‘zlashtirish va mustahkamlash imkoniyatiga ega bo‘ldi. Universitet klinik bazalari soni kengaytirilib, ta’lim jarayoni respublikamizning yetakchi tibbiyot markazlari (universitet klinikalari, respublika ixtisoslashtirilgan ilmiy amaliy tibbiyot markazlari, shaxar (viloyat) shifoxonalari, oilaviy poliklinikalar, xususiy shifoxonalar, sanitar-epidemiologik osoyishtalik tashkilotlari)ning yuqori texnologiyali laboratoriyalari va klinik materiallardan samarali foydalangan holda amalga oshirilmoqda. Buning natijasida ta’lim sifati va bitiruvchilarning kasbiy tayyorgarligi sezilarli darajada oshdi.

Universitetning xalqaro maydondagi nufuzi va mavqeyi tobora oshib bormoqda. Bugungi kunda 190 ta xorijiy universitet va tibbiyot markazlari bilan hamkorlik o‘rnatilgan, 27 ta ta’lim yo‘nalishi Butunjahon tibbiy ta’lim federatsiyasi talabalari asosida xalqaro akkreditatsiyadan o‘tgan, xorijiy hamkorlar bilan 37 ta qo‘shma ta’lim dasturi amalga oshirilmoqda. 30 dan ortiq davlatdan kelgan 3,5 mingdan ziyod xorijiy talabalar universitetimizda tahsil olmoqda.

Reyting ortida turgan strategiya

Xalqaro reytinglarda munosib o‘rin egallash tasodif yoki qisqa muddatli kampaniya mahsuli emas. Bu yillar davomida shakllangan taraqqiyot strategiyasi, aniq rejalashtirilgan boshqaruv va tizimli mehnatning natijasidir. Toshkent davlat tibbiyot universitetining THE Impact Rankings–2026 reytingidagi muvaffaqiyati ham aynan shu tamoyillarga tayangan holda qo‘lga kiritildi.

So‘nggi yillarda universitet o‘z oldiga faqat malakali shifokor tayyorlash vazifasini emas, balki xalqaro raqobatbardosh ilmiy-ta’lim markazini shakllantirish maqsadini qo‘ydi. Bu esa ta’lim mazmunini yangilash, ilmiy tadqiqotlarni kengaytirish, klinik amaliyotni takomillashtirish va boshqaruv tizimini zamon talablari asosida isloh qilishni talab etardi.

Avvalo, ta’lim jarayoni raqamli texnologiyalar bilan boyitildi. Simulyatsion markazlar tashkil etildi, virtual ta’lim platformalari joriy qilindi, sun’iy intellekt elementlarini tibbiy ta’limga tatbiq etish bo‘yicha dastlabki qadamlar tashlandi. Bu o‘zgarishlar talabalarning nazariy bilimlarini amaliy ko‘nikmalar bilan uyg‘unlashtirish imkonini kengaytirdi.

Shu bilan birga, universitet xalqaro hamkorlikni rivojlantirishga ustuvor ahamiyat berdi. Akademik mobillik dasturlari kengaydi, xorijiy professorlar ishtirokida ma’ruzalar va mahorat darslari tashkil etildi, qo‘shma ilmiy tadqiqotlar ko‘lami kengaydi. Bu esa professor-o‘qituvchilar va talabalar uchun xalqaro tajribani o‘zlashtirish imkoniyatini yaratdi.

Biroq universitet taraqqiyotining eng muhim omili — ilm-fanga munosabatning o‘zgarganidir. Ilmiy faoliyat endi faqat dissertatsiya yozish yoki maqola chop etish bilan cheklanmaydi. Universitetda ilmiy g‘oyaning amaliyotga tatbiq etilishi, tadqiqot natijalarining klinik faoliyatga joriy qilinishi va ularning jamiyat salomatligiga xizmat qilishi asosiy mezon sifatida qaralmoqda.

Ayni paytda universitetda fundamental va amaliy tibbiyot integratsiyasi kuchayib, tibbiyotning dolzarb muammolariga innovatsion yechimlar ishlab chiqishga alohida e’tibor qaratilmoqda. Bu yondashuv nafaqat ilmiy samaradorlikni oshirmoqda, balki universitetning xalqaro ilmiy maydondagi nufuzini ham mustahkamlamoqda.

Ta’lim, ilm-fan va klinik amaliyotni bir butun tizim sifatida rivojlantirish orqali Toshkent davlat tibbiyot universiteti o‘zining strategik taraqqiyot modelini shakllantirdi. Bugun xalqaro reytinglarda qayd etilayotgan natijalar ana shu modelning samaradorligini tasdiqlamoqda.

 Reklama huquqi asosida