BMW yong‘in xavfi sabab 330 mingta avtomobilni qaytarib olyapti

Asboblar panelidagi kabellar noto‘g‘ri o‘tqizilgani sabab BMW konserni butun dunyo bo‘ylab taxminan 330 mingta avtomobilni qaytarib olish haqida qaror qabul qildi. Bu nuqson tutun chiqishi va yong‘in bilan kechishi mumkin bo‘lgan qisqa tutashuvga olib kelishi ehtimoli bor.

Foto: AP

BMW asboblar panelida qisqa tutashuv xavfi borligi sabab butun dunyo bo‘ylab taxminan 330 000 ta avtomobilni qaytarib oladi. Bu haqda 27 fevral, juma kuni dpa agentligi kompaniyaning Germaniya Federal avtotransport idorasi (Kraftfahrt-Bundesamt, KBA) ma’lumotlar bazasida e’lon qilingan tegishli bildirishnomaga tayanib xabar berdi.

Gap 2022 yil 9 iyundan 2025 yil 5 dekabrgacha ishlab chiqarilgan i5, 7 Series, M5, 5 Series va i7 modellari haqida bormoqda. BMW ma’lum qilishicha, asboblar panelida simlarni noto‘g‘ri o‘tqizish “salon mikrofiltri almashtirilganda kabellar shikastlanishiga va ehtimoliy qisqa tutashuvga — yong‘in chiqishiga olib kelishi mumkin”.

Dpa qayd etishicha, kompaniyaga hozircha ushbu nuqson bilan bog‘liq birorta ham baxtsiz hodisa ma’lum emas. BMW moy va salon filtrini almashtirgan mijozlariga kabellarning xavfsizligini darhol tekshirish va zarur bo‘lsa, qo‘shimcha xavfsizlik choralari bilan qayta ishlashni tavsiya qilmoqda.

2026 yil fevral oyi boshida BMW konserni yong‘in chiqish xavfi tufayli taxminan 500 000 ta avtomobilni ham qaytarib olgan edi.

2-seriya Coupe, 3-, 4- va 5-seriyalarning bir necha variantlari, 6-seriya Gran Turismo, 7-seriya Limousine, shuningdek BMW X4, X5, X6 va Z4 modellari tekshirilganda, ularning magnitli o‘chirgich ko‘p marta ishga tushirilgandan so‘ng yeyilib (eskirib) ketishi mumkinligi aniqlangan. Handelsblatt gazetasi xabar qilishicha, bu avtomobilni ishga tushirishda muammolar, qisqa tutashuv va starterning qizib ketishi xavfini keltirib chiqarishi mumkin.