Yangi BMW i3 50L elektr sedani Xitoydagi yoʻl sinovlari davomida qayta quvvatlanmasdan 1213 km masofani bosib oʻtdi. Bu haqda Car News China nashri xabar berdi.
Avtomobil belgilangan manzilga akkumulyatorning 1 foiz qoldiq quvvati bilan yetib keldi. Bosib oʻtilgan masofa eʼlon qilingan yurish zaxirasining 118 foizini tashkil etdi, bu esa brendning uzoq masofaga yurish sinovlaridagi yangi rekordiga aylandi.
Sinov vaqtida oʻrtacha elektr energiyasi sarfi 100 km uchun atigi 8,8 kVt·soatni tashkil etdi. Shu bilan birga, yoʻnalish avtomagistrallar, oddiy yoʻllar va shahar koʻchalarini oʻz ichiga olgan edi.
BMW i3 50L yangi Neue Klasse elektr platformasi negizida yaratilgan. Sinovdan oʻtkazilgan sedan 113,4 kVt·soat sigʻimli akkumulyator va 800 voltli arxitektura bilan jihozlangan. BMW i3 50L modelini seriyali ishlab chiqarish va Xitoy bozoriga olib chiqish 2026-yil toʻrtinchi choragiga rejalashtirilgan.
Sinovlar BMW kompaniyasining Xitoyning Shenyan shahridagi zavodida oltinchi avlod akkumulyatorlarini seriyali ishlab chiqarish boshlanishi munosabati bilan oʻtkazildi.
