Toshkent iqlimiga mos ko‘chatlar yetishtirish yo‘lga qo‘yildi

Toshkent shahri iqlimiga mos ko‘chatlarni yetishtirish bo‘yicha yangi loyiha doirasida 21 gektar hududda daraxt va butalarni parvarishlash yo‘lga qo‘yildi. Ushbu maydonga eman, chinor, lipa, lola daraxti, zarang hamda sadaqayrag‘och kabi turlar ekilishi rejalashtirilgan.

Qayd etilishicha, hudud to‘liq avtomatik tomchilatib sug‘orish tizimi bilan jihozlanadi. Sug‘orish jarayonlarida artezian suvidan foydalaniladi.

Hozirda 5 gektar maydonda ko‘chat ekish ishlari boshlangan bo‘lib, bu hududga 6 turdagi jami 8 640 ta daraxt ko‘chati ekish ko‘zda tutilgan. Ko‘chatlar ikki yil davomida shu yerda parvarish qilinib, keyinchalik Toshkent shahrining turli hududlariga ko‘chirib o‘tkaziladi.

Ma’lum qilinishicha, ko‘chatlar Turkiya, Italiya, Germaniya, Niderlandiya, Ispaniya, shuningdek Yevropa va Xitoydan keltirilmoqda. Ishlar turkiyalik mutaxassis nazorati ostida amalga oshirilmoqda.