Angrendagi fojia ortidan: daydi itlarga qarshi choralar kuchaytirildi

Angrenda yuz bergan ayanchli hodisa - maktab o‘quvchisining daydi it hujumi oqibatida vafot etishi ortidan mas’ul tashkilotlar tomonidan shoshilinch chora-tadbirlar boshlandi. Hozirda hududda daydi hayvonlarni tutish va aholi xavfsizligini ta’minlash ishlari kuchaytirilgan.

Ma’lum qilinishicha, hodisa yuzasidan tegishli tashkilotlar tomonidan tezkor o‘rganish ishlari olib borilmoqda. Ayni paytda shahar va viloyat hududida daydi hayvonlarni nazorat qilish, ularni tutish hamda belgilangan maxsus joylarda saqlash ishlari kuchaytirildi.

Ko‘rilgan chora-tadbirlar natijasida o‘quvchi bolaga hujum qilgan it Angren shahar obodonlashtirish bo‘limi daydi hayvonlarni tutish guruhi tomonidan ushlandi. Itga nisbatan tegishli tartibda akt tuzilib, maxsus saqlash joyiga olib borilgan.

Shuningdek, viloyat hokimligi mas’ullari ishtirokida o‘tkazilgan shoshilinch muhokamada obodonlashtirish xizmati, veterinariya bo‘limi, sanitariya-epidemiologik osoyishtalik xizmati hamda boshqa mutasaddi idoralarga tezkor chora-tadbirlarni amalga oshirish bo‘yicha topshiriqlar berildi.

Xususan, aholi xavfsizligini ta’minlash, daydi hayvonlarni tutish va zararsizlantirish hamda kelgusida bu kabi holatlarning oldini olishga qaratilgan tizimli ishlar kuchaytirilmoqda.

Ma’lum qilinishicha, mazkur masala alohida nazoratga olingan bo‘lib, jamoatchilik xavfsizligini ta’minlash borasida barcha zarur choralar ko‘riladi.