Ramazon hayiti va Navro‘z bayrami arafasida qo‘shimcha poyezd qatnovlari va o‘rinlar ajratildi. Bu haqda «O‘zbekiston temir yo‘llari» xabar berdi.
Qayd etilishicha, 19–25 mart kunlari jami 25 mingta qo‘shimcha o‘rin yaratildi. Shu doirada Toshkent—Samarqand—Toshkent yo‘nalishida 19–21 mart kunlari 6 ta qo‘shimcha «Afrosiyob» reysi yo‘lga qo‘yiladi. Toshkent—Buxoro—Toshkent yo‘nalishida esa 19, 20, 21, 22, 23 va 25 mart kunlari qo‘shimcha qatnovlar tashkil etiladi.
Ma’lum qilinishicha, 19–24 mart kunlari Toshkent—Buxoro—Toshkent yo‘nalishida qo‘shimcha «Afrosiyob» poyezdlari ham harakatlanadi.
Shuningdek, 19–25 mart kunlari Toshkent—Xiva, Toshkent—Shovot, Toshkent—Qo‘ng‘irot, Toshkent—Termiz hamda Toshkent—Buxoro (Sharq) yo‘nalishlaridagi poyezdlarga 4 tadan qo‘shimcha vagon ulanadi. Ushbu choralar orqali amaldagi reyslarda yana 21,5 ming nafar yo‘lovchini tashish imkoniyati yaratilishi ta’kidlanmoqda.
Kompaniya ma’lumotiga ko‘ra, chiptalarni rasmiy sayt, mobil ilova va temir yo‘l kassalari orqali xarid qilish mumkin. Yo‘lovchilardan safarlarini oldindan rejalashtirish so‘ralgan.
