Kiyev Hindistondan qo‘lga olingan ukrainaliklarni ozod etishni so‘ramoqda

Ukraina hukumati Hindistonga ushbu mamlakat hududida qo‘lga olingan olti nafar ukrainalikni ozod qilish so‘rovi bilan murojaat qildi. 16 mart kuni sud ukrainaliklar, shuningdek ular bilan birga qo‘lga olingan bir nafar AQSh fuqarosining qamoqda saqlash muddatini 27 martgacha uzaytirdi, deb yozadi Reuters agentligi 18 mart, chorshanba kuni sud qaroriga tayanib.

Shu ma’lumotlarga ko‘ra, yetti nafar hibsga olingan shaxs Hindistonning shimoli-sharqiy qismidagi Mizoram shtatiga noqonuniy kirish, qo‘shni Myanma bilan chegarani noqonuniy kesib o‘tish va mamlakatda hukmron harbiy xuntaga qarshi kurashayotgan etnik guruhlar vakillariga dronlardan foydalanishni o‘rgatishda ayblanmoqda. Agentlik qayd etishicha, ularga, shuningdek, Yevropadan Hindiston hududi orqali Myanmaga yirik partiyada dronlarni noqonuniy olib kirish aybi ham qo‘yilmoqda.

Ukrainaning Nyu-Dehlidagi elchisi Aleksandr Polishchuk 16 mart kuni Hindiston Tashqi ishlar vazirligining yuqori lavozimli vakili Sibi Jorj bilan uchrashib, unga “Ukraina fuqarolarini zudlik bilan ozod qilish va ularga kirish imkonini berish talab qilingan” norozilik notasini topshirdi.

Elchixona bayonotida shunday deyilgan: “Biz e’tibor qaratamizki, Hindistonda xorijiy fuqarolar uchun kirish cheklangan ayrim hududlar mavjud bo‘lib, u yerlarga faqat maxsus ruxsatnoma bilan kirish mumkin. Shu bilan birga, bunday hududlarning joylarda tegishlicha belgilanmagani ko‘p uchraydi, bu esa o‘rnatilgan qoidalarni bilmasdan buzib qo‘yish xavfini tug‘diradi”.

Ukraina Tashqi ishlar vazirligi 17 mart kuni mamlakatning olti nafar fuqarosi 13 martda Hindistonda qo‘lga olinganini tasdiqladi. Vazirlik ta’kidlashicha, hozircha ukrainaliklarning teraktlar tayyorlashga aloqadorligini tasdiqlaydigan hech qanday faktlar yo‘q, bu haqda avvalroq Hindiston va Rossiya ommaviy axborot vositalari xabar bergan edi. Kiyevda aytishlaricha, ayrim nashrlar mavjud faktlarni buzib ko‘rsatmoqda, manipulyativ tusga ega va asossiz ayblovlarni ilgari surmoqda.

Tashqi ishlar vazirligi ma’lumotiga ko‘ra, ayblovlar Mizoram shtati hududida ruxsatsiz bo‘lib turish bilan bog‘liq, chunki bu hududga tashrif buyurish uchun maxsus ruxsat talab qilinadi. Shuningdek, Myanma chegarasini ehtimoliy ravishda noqonuniy kesib o‘tish haqida ham gap ketmoqda.

Kiyev, shuningdek, Ukraina elchixonasi xodimlari 16 mart kuni sud majlisiga kelganini, ammo ularga qo‘lga olinganlar bilan bevosita muloqot qilishga ruxsat berilmaganini bildirdi. “Shakllangan xalqaro amaliyotga zid ravishda, Hindistondagi Ukraina elchixonasi Ukraina fuqarolari qo‘lga olingani haqida Hindistonning vakolatli organlaridan rasmiy xabar olmadi. Ukraina tomoni qo‘lga olinganlarga konsullik xodimlarining zudlik bilan va to‘siqsiz kirishini ta’minlashda qat’iy turibdi”, deb iqtibos keltiradi Ukraina Tashqi ishlar vazirligi bayonotidan “Ukrainskaya pravda” nashri.

Sud qarori bilan Hindistonda ushlab turilgan olti nafar ukrainalikka ukrain konsullari haligacha kira olmagan. Bu haqda 18 mart, chorshanba kuni Ukraina Tashqi ishlar vazirligi matbuot xizmati DW'ga bergan izohida ma’lum qildi. Matbuot xizmati ta’kidlashicha, Ukraina tomoni qo‘lga olinganlarga kirish imkonini berishni bir necha bor so‘ragan. “Bugun, 18 mart kuni, Ukrainaning Hindistondagi elchixonasi yana bir bor Hindiston Tashqi ishlar vazirligiga konsullarga fuqarolar bilan zudlik bilan va to‘siqsiz uchrashish imkonini berish talabi bilan rasmiy nota yubordi”, dedi vazirlik matbuot xizmati.