Dunyo bo‘ylab maktablarda telefon cheklovlari keskin oshdi

YuNeSKOning Ta’lim monitoringi bo‘yicha global hisobotiga ko‘ra, hozirda dunyodagi ta’lim tizimlarining 58 foizi maktablarda mobil telefonlardan foydalanishni cheklagan yoki taqiqlagan. Bu ko‘rsatkich 2023 yilda atigi 24 foizni tashkil etgan edi.

Mutaxassislar bu o‘sishni o‘quvchilar diqqatining pasayishi, kiberbulling holatlari va ijtimoiy tarmoqlarning bolalar psixologiyasiga ta’siri bilan izohlamoqda. Shuningdek, ekran vaqti ortishi ta’lim samaradorligiga salbiy ta’sir ko‘rsatayotgani ta’kidlanmoqda.

So‘nggi vaqtlarda Boliviya, Xorvatiya, Malta va Maldiv orollari kabi qator davlatlar ham milliy darajada telefon cheklovlarini joriy etgan. Ayrim mamlakatlarda esa bu masala yanada kuchaytirilib, qonunchilik darajasiga olib chiqilmoqda.

Ekspertlar fikricha, telefon cheklovlari o‘quvchilarning darsdagi faolligini oshirish, jonli muloqotni rivojlantirish va ta’lim muhitini yaxshilashga xizmat qiladi. Biroq ba’zi mutaxassislar texnologiyalarni to‘liq taqiqlash emas, balki ulardan oqilona foydalanish madaniyatini shakllantirish muhimligini ham ta’kidlamoqda.

Umuman, maktablarda smartfonlardan foydalanishni cheklash global ta’lim siyosatidagi asosiy trendlardan biriga aylanib bormoqda.