Toshkentdagi xususiy oliygohlarda o‘qish qancha turadi?

Toshkentdagi xususiy oliygohlarda bir yillik ta’lim narxi 11 million so‘mdan 135 million so‘mgacha bo‘lib, farq 12 baravarni tashkil etadi. Oliy ta’lim vazirligining 2025 yil yanvar oyi holatiga bergan ma’lumotga ko‘ra, O‘zbekistonda 208 ta universitet faoliyat yuritadi, shundan 100 tasi xususiy va xorijiy hisoblanadi. Narx ta’lim sifati yoki reytingga emas, balki oliygoh modeliga bog‘liq: uni kim tashkil etgan, qanday diplom beradi va ta’lim qaysi tilda olib boriladi. Biz o‘qish narxi, narx nimaga bog‘liq ekanini tushuntirish uchun xususiy oliygohlar va xorijiy filiallarning prays-listlarini jamladik.

Taqqoslash uchun qaysi oliygohlarni oldik?

Toshkentda bir necha turdagi universitet modellari xususiy oliygohlar sifatida faoliyat yuritadi va ularni narx bo‘yicha to‘g‘ridan to‘g‘ri taqqoslash har doim ham to‘g‘ri emas.

● Mahalliy xususiy oliygohlar — xususiy muassislar tomonidan tashkil etilgan va O‘zbekiston litsenziyasi asosida faoliyat yurituvchi mahalliy universitetlar.

● Xorijiy hamkorga ega oliygohlar — xorijiy ta’lim muassasalari bilan hamkorlikda ta’lim dasturlarini amalga oshiruvchi o‘zbek universitetlari.

● Xorijiy filiallar — xorijiy universitetlarning Toshkentdagi kampuslari bo‘lib, bosh oliygoh dasturlari asosida faoliyat yuritadi.

● Xususiy tibbiyot dasturlari — o‘qish narxi nisbatan yuqori bo‘lgan alohida segment (MBBS — umumiy tibbiyot, DDS — stomatologiya va boshqalar).

Toshkentdagi xususiy oliygohlarda o‘qish qancha turadi?

Hatto bitta oliygohning o‘zida ham narxlar bir necha baravar farq qilishi mumkin: odatda asosiy gumanitar yo‘nalishlar arzonroq, IT va xalqaro dasturlar qimmatroq turadi, tibbiy ta’lim esa eng qimmat segment bo‘lib qolmoqda. Narxlar kunduzgi ta’lim shakli uchun ko‘rsatilgan.

Yiliga 15 mln so‘mgacha

Davlat namunasidagi diplom beruvchi to‘liq o‘zbek xususiy oliygohlari. Asosan pedagogika, iqtisodiyot va gumanitar mutaxassisliklar ustunlik qiladi; IT yo‘nalishlari ham mavjud, ammo kam. Qabul oliygohning ichki imtihoni asosida amalga oshiriladi.

Yiliga 15–30 mln so‘mgacha

Eng keng va turli xil segment. Bunda yirik o‘zbek oliygohlari, hamyonbop dasturlarga ega koreys universitetlari va xorijiy diplom beruvchi oliygohlar mavjud. Diplom turi muayyan oliygoh va ta’lim dasturiga bog‘liq.

Yiliga 30–55 mln so‘mgacha

Xorijiy filiallar va xorijiy diplom beruvchi oliygohlar. O‘qish narxi hamkor universitet va ta’lim dasturi shakliga qarab belgilanadi. Hujjat topshirishdan oldin diplom ishlash yoki o‘qishni davom ettirish rejalashtirilayotgan mamlakatda qanday tan olinishini aniqlashtirib olish tavsiya etiladi.

Ma’lumotlar 2025–2026 va 2026–2027 o‘quv yillari uchun dolzarb hisoblanadi. Manbalar: oliygohlarning rasmiy veb-saytlari, mentalaba.uz, stat.edu.uz. Narxlar har o‘quv yili boshida o‘zgarishi mumkin.

Yiliga 55 mln so‘mdan yuqori

Ushbu toifadagi yagona oliygoh — Central Asian University (CAU) (sobiq AKFA University) O‘zbekistonda QS reytingida 4 yulduzga ega bo‘lgan yagona xususiy oliygoh hisoblanadi. Ta’lim to‘liq ingliz tilida, xalqaro akkreditatsiyaga ega.

Ma’lumotlar 2025–2026 va 2026–2027 o‘quv yillari uchun dolzarb hisoblanadi. Manbalar: oliygohlarning rasmiy veb-saytlari, mentalaba.uz, stat.edu.uz. Narxlar har o‘quv yili boshida o‘zgarishi mumkin.

Bir xil mutaxassislikning narxi qanchalik farq qilishi mumkin?

Toshkentning turli oliygohlarida nomi bir xil bo‘lgan ta’lim yo‘nalishlari narx jihatidan bir necha baravar farq qilishi mumkin — bu ta’lim tili, dastur shakli va diplom turiga bog‘liq.

IT

UST davlat namunasidagi, Coventry – Britaniyaning Koventri universiteti diplomini beradi. Narx ta’lim tili va diplom turini aks ettiradi.

Tibbiyot

Tibbiyot o‘qish muddati uzoqligi (5–6 yil), klinik amaliyot va maxsus infratuzilma bois boshqa yo‘nalishlarga nisbatan qimmatroq. CAU MBBS dasturi ingliz tilida bo‘lib, xalqaro akkreditatsiyaga ega, IPER esa davlat namunasidagi diplom beradi.

Biznes va menejment

Sarbon va TEAM orasidagi farq uch baravardan ko‘p. Sarbon – davlat diplomi, o‘zbek tilidagi ta’lim. TEAM – Britaniya diplomi, ingliz tilidagi dastur.

Biz Toshkentdagi xususiy oliygohlarning narxlar, toifalar va yo‘nalishlar bo‘yicha to‘liq bazasini jamladik. Uni ushbu havola orqali ko‘rish mumkin.

Kontraktni bo‘lib to‘lash yoki chegirma olish mumkinmi?

Toshkentdagi aksariyat xususiy oliygohlar kontrakt to‘lovini bosqichma-bosqich amalga oshirishga ruxsat beradi. Eng keng tarqalgan format — semestrlar bo‘yicha to‘lash: summaning bir qismi kuzgi semestr boshida, qolgan qismi esa bahorgi semestr oldidan to‘lanadi.

Ayrim universitetlar yanada moslashuvchan shartlarni taklif qiladi. Masalan, TEAM University kontraktning to‘liq summasi oldindan to‘langanda 5% chegirma beradi.

British Management University esa quyidagi qo‘llab-quvvatlash dasturlarini e’lon qilgan:

●      20% va 50% chegirmalar;

●      akademik grantlar;

●      ijtimoiy grantlar;

●      tanlov asosida o‘qish qiymati to‘liq qoplanadigan dasturlar.

Ko‘plab oliygohlarda chegirmalar o‘qishdagi akademik o‘zlashtirish, til imtihonlari natijalari yoki ichki kirish tanlovlari natijalariga bog‘liq bo‘ladi.