Davlat mehnat inspeksiyasi ma’lum qilishicha, ko‘rsatmada anomal issiq sharoitida mehnat xavfsizligini ta’minlashga qaratilgan qator majburiy talablar belgilangan.
Unga ko‘ra, mahalliy hokimliklar va tegishli tashkilotlar ochiq havoda mehnat qilayotgan xodimlar uchun moslashuvchan ish rejimini joriy etishi, yuqori harorat ta’sirida bajariladigan ishlarni esa soat 10:00–17:00 oralig‘ida vaqtincha to‘xtatishi lozim.
Shuningdek, ish beruvchilar xodimlarni yetarli miqdorda sifatli ichimlik suvi bilan ta’minlashi, quyosh nurlari va yuqori haroratdan himoyalangan dam olish joylarini tashkil etishi talab etildi.
Ko‘rsatmaga muvofiq, majburiy tibbiy ko‘rikdan o‘tmagan yoki tibbiy xulosaga ko‘ra ishga yaroqsiz deb topilgan shaxslarni ishga jalb etishga yo‘l qo‘yilmaydi. Bundan tashqari, xodimlar shaxsiy himoya vositalari bilan ta’minlanishi hamda mehnat va dam olish tartibi qayta ko‘rib chiqilishi kerak.
Hujjatda yuqori harorat ta’sirida sog‘lig‘i yomonlashgan xodimga zudlik bilan birinchi tibbiy yordam ko‘rsatish choralarini ko‘rish ham belgilangan.
Davlat mehnat inspeksiyasi mazkur talablarning bajarilishi doimiy nazorat qilinishini ma’lum qildi. Mehnatni muhofaza qilish qoidalarini buzgan mansabdor va mas’ul shaxslar esa amaldagi qonunchilikka muvofiq javobgarlikka tortiladi.
