Reuters agentligining xabar berishicha, Yevropa Ittifoqining raqobatni nazorat qiluvchi asosiy organi - Yevropa komissiyasi Paramount Skydance kompaniyasi tomonidan Warner Bros. Discovery (WBD) mediaxoldingini 110 milliard dollarga sotib olish bo‘yicha bitimga rozilik berdi.
Komissiya ma’lum qilishicha, Paramount Skydance Yevropa bozorida raqobatga doir xavotirlarni bartaraf etish uchun qator majburiyatlarni o‘z zimmasiga olgan.
UIP faoliyati tugatiladi
Kelishuvga muvofiq, bitim rasman yakunlanganidan keyin 13 oy ichida Paramount Skydance Yevropa hududida United International Pictures (UIP) kompaniyasi faoliyatini to‘xtatadi.
UIP - Paramount va Universal Pictures tomonidan tashkil etilgan qo‘shma kino distributsiyasi kompaniyasi hisoblanadi.
Shuningdek, Paramount Skydance keyingi 10 yil davomida Universal Pictures bilan Yevropada filmlar distributsiyasi bo‘yicha yangi kelishuvlar tuzmaslik majburiyatini oldi.
Bundan tashqari, Warner Bros. filmlarining kinoteatrlardagi tarqatish huquqlari Paramountʼning o‘z distribyutoriga berilmaydi.
Yevrokomissiya aynan shu majburiyatlar raqobat muhitiga oid xavotirlarni bartaraf etganini bildirdi.
AQShda bitim sud tomonidan to‘xtatilgan
Shu bilan birga, AQShda mazkur kelishuv hozircha amalga oshirilmaydi.
O‘tgan hafta Kaliforniya shtati, Oklend okrug sudi sudyasi Araseli Martines-Olgin 12 shtat bosh prokurorlarining qo‘shma murojaatini qanoatlantirib, bitimni 14 kunga vaqtincha to‘xtatish haqida qaror chiqardi.
Kaliforniya bosh prokurori Rob Bonta va boshqa prokurorlar fikricha, bunday yirik birlashuv kino prokati hamda kabel telekanallari kontentini litsenziyalash bozorida raqobatni susaytirishi mumkin.
Yirik media aktivlar bir qo‘lga o‘tishi mumkin
Warner Bros. Discovery tarkibiga Warner Bros. kinostudiyasi, HBO telekanali, HBO Max striming platformasi, shuningdek, CNN, TNT Spors va Discovery kabi yirik telekanallar kiradi.
Agar bitim to‘liq amalga oshsa, ushbu aktivlar Paramount Skydance rahbari Devid Ellison nazoratiga o‘tadi.
Devid Ellison - Oracle korporatsiyasi asoschisi, milliarder Larri Ellisonning o‘g‘li hisoblanadi.
Bitimga qarshi da’volar ham mavjud
Mazkur bitimga qarshi Amerika Ssenaristlar gildiyasi ham sudga murojaat qilgan.
Ularning fikricha, birlashuv ssenaristlarning mehnat bozoridagi imkoniyatlarini qisqartiradi va AQSh ko‘ngilochar industriyasiga salbiy ta’sir ko‘rsatishi mumkin.
Bundan tashqari, Buyuk Britaniya ham ushbu bitimni diqqat bilan kuzatayotganini ma’lum qildi.
Britaniya rasmiylari birlashuv yangiliklar xizmati, bolalar uchun televizion dasturlar va striming platformalari faoliyatiga salbiy ta’sir ko‘rsatishi mumkinligidan xavotir bildirgan.
