O‘zbekistonda yo‘llardagi xavfsizlikni ta’minlashga qaratilgan yangi javobgarlik choralari kiritiladi. Tegishli qonun loyihasi Qonunchilik palatasidagi partiyalarning fraksiyalari tomonidan ko‘rib chiqilyapti.
Qonun loyihasiga ko‘ra:
“avtomototransport vositasini vaqtincha olib qo‘yish” jazo chorasi joriy etiladi, bunda ayrim qo‘pol qoidabuzarliklarni sodir etgan shaxslarning transport vositalari sud qarori asosida 6 oydan 1 yilgacha muddatga jarima maydoniga joylashtirilishi mumkin;
- tezlikni belgilangan me’yordan 80 km/soatdan ortiq oshirganlik uchun haydovchi transport boshqarish huquqidan mahrum qilinadi va 26,8 million so‘mgacha jarimaga tortiladi;
- transport vositasini boshqarish huquqiga ega bo‘lmagan yoki mazkur huquqdan mahrum etilgan shaxs tomonidan sodir etilgan “yo‘l bezoriligi” uchun amaldagi jazolarga qo‘shimcha ravishda transport vositasi musodara qilinadi yoki vaqtincha olib qo‘yiladi;
- voyaga yetmagan shaxsga transport boshqarishni topshirish og‘ir oqibatlarga olib kelgan hollarda aybdor shaxs jinoiy javobgarlikka tortiladi;
- mast holda transport boshqarish, noqonuniy poygalar, yuk mashinasini tungi vaqtda boshqalarga xavf tug‘diradigan holda to‘xtatib qo‘yish va boshqa xavfli harakatlar uchun javobgarlik kuchaytiriladi;
- poygalar faqat maxsus ajratilgan hududlarda, xavfsizlik talablariga rioya qilgan holda, sport tadbiri sifatida o‘tkazilishi mumkin.
Qonun loyihasi “Yo‘l harakati xavfsizligi tizimi takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida” deb nomlanadi.
Bu o‘zgarishlar yo‘llarda xavfsizlikni ta’minlash, inson hayoti va salomatligini himoya qilishga qaratilgan.
