Surxondaryo viloyatining Boysun tumanidagi o‘rmonda yong‘in chiqdi. Viloyat FVB axborot xizmati hodisa yuzasidan rasmiy munosabat bildirdi.
Ma’lum qilinishicha, 12-avgust kuni soat 17:15 da “112” tizimi orqali Boysun davlat o‘rmon xo‘jaligiga qarashli Xomkon o‘rmon bo‘limi hududida quruq o‘t va shox-shabbalar yonganligi to‘g‘risida xabar kelib tushgan.
Hodisa joyiga Surxondaryo viloyati FVB hamda Boysun davlat o‘rmon xo‘jaligining kuch va vositalari jalb etilgan. Yong‘inni bartaraf etish ishlariga FVBdan 194 nafar shaxsiy tarkib va 8 ta texnika, Boysun davlat o‘rmon xo‘jaligidan 60 nafar shaxsiy tarkib va 3 ta texnika, shuningdek, mahalliy aholidan 55 nafar ko‘ngilli fuqaro jalb etilgan.
15-avgust soat 9:00 holatiga ko‘ra, yong‘in to‘liq bartaraf etilgan. Hodisa oqibatida taxminan 1 gektar maydondagi quruq o‘t va shox-shabbalar yongan. Tan jarohati olganlar to‘g‘risida ma’lumot kelib tushmagani bildirilgan.
Hozirda yong‘inning kelib chiqish sababi aniqlanmoqda.
