Bu prezident tomonidan 17-avgust kuni imzolangan O‘RQ–1168-son qonunda belgilandi. Hujjat bilan tadbirkorlik faoliyati erkinligining kafolatlariga oid qonunchilikka qator o‘zgartirish va qo‘shimchalar kiritilgan.
Qonunga muvofiq, nazorat qiluvchi organlar tadbirkorlik sub’yektlarida tekshiruv o‘tkazishda «Xavfni tahlil qilish» elektron tizimidan foydalanadi. Ushbu tizim natijalari asosida tadbirkorlar faoliyati xavf darajasiga qarab past, o‘rta va yuqori toifalarga ajratiladi.
Bunda nazorat qiluvchi organlar tekshiruv o‘tkazish vakolatiga ega mansabdor shaxslar, tekshiriladigan sohalar va tekshiruvlarni o‘tkazish uchun ruxsat beriladigan maxsus guvohnomaga ega xodimlar haqidagi ma’lumotlarni maxsus reyestrlarga kiritishi nazarda tutilgan.
Shuningdek, tadbirkorlik sub’yekti faoliyatida qonunbuzilish sodir etilishi xavfi darajasidan kelib chiqib, nazorat choralari belgilanadi. Qonunda nazarda tutilgan hollarda tekshiruv Biznes-ombudsman xabardor qilinganidan so‘ng o‘tkaziladi.
Nazorat qiluvchi organlar tomonidan tadbirkorlarga nisbatan moliyaviy sanksiya qo‘llash tartibi ham aniqlashtirilgan. Xususan, moliyaviy sanksiya qo‘llash to‘g‘risidagi qarorni tadbirkor ixtiyoriy ravishda bajarish uchun unga qaror qabul qilingan kundan boshlab 10 kunlik muddat beriladi.
Agar tadbirkor moliyaviy sanksiya summasining 50 foizini 10 kun ichida ixtiyoriy ravishda to‘lasa, qolgan qismini to‘lashdan ozod etiladi. Mazkur tartib tadbirkor moliyaviy sanksiya qo‘llash haqidagi qaror ustidan shikoyat qilmagan taqdirda amal qiladi.
Qonun rasmiy e’lon qilingan kundan e’tiboran uch oy o‘tgach kuchga kiradi.
