Qurilish vazirligi Kun.uz tomonidan e’lon qilingan «Qurilishdagi samarasiz nazorat: Newport misolida tizimli muammoga nazar» maqolasiga munosabat bildirdi.
Maqolada qurilish sohasidagi nazorat, noqonuniy ob’yektlar, mas’ullarning javobgarligi hamda bunday uylardan xonadon sotib olgan fuqarolar huquqlari muhokama qilingan, shuningdek, Newport majmuasi misolida qurilishga mas’ul davlat organlari tomonidan yetarli nazorat o‘rnatilmagani haqida fikrlar bildirilgan edi.
Vazirlik tomonidan e’lon qilingan bayonotda aytilishicha, Vazirlar Mahkamasi huzuridagi Qurilish va uy-joy kommunal xo‘jaligi sohasida nazorat qilish inspeksiyasi tomoidan bir muddat avval e’lon qilingan ma’lumotlar ob’yektdagi qoidabuzarliklar nazoratsiz qoldirilmaganini ko‘rsatadi.
«Yakkasaroy tumanida “MEGA LOGISTICS SERVICE” MChJ tomonidan qurilayotgan Newport majmuasi jami 9 ta blokdan iborat. Ularning 3 tasi bo‘yicha Arxitektura va shaharsozlik kengashi ishchi organining ijobiy xulosasi hamda tegishli ekspertiza xulosalari mavjud. Ushbu bloklarda qurilish-montaj ishlarini boshlash Toshkent shahar hududiy nazorat inspeksiyasida belgilangan tartibda ro‘yxatdan o‘tkazilgan.
Qolgan 6 ta blokda esa qurilish-montaj ishlari Inspeksiyadan belgilangan tartibda ro‘yxatdan o‘tkazilmasdan olib borilayotgani nazorat tadbirlari davomida aniqlangan.
Aniqlangan qoidabuzarliklar yuzasidan buyurtmachi - “MEGA LOGISTICS SERVICE” MChJga bir necha marta bajarilishi majburiy bo‘lgan yozma ko‘rsatmalar berilgan. Kompaniyadan qurilishni tasdiqlangan shaharsozlik hujjatlari asosida davom ettirish va ob’yektlarni Inspeksiyadan tegishli tartibda ro‘yxatdan o‘tkazish talab qilingan.
Biroq ko‘rsatmalarda belgilangan talablar bajarilmagan. Natijada kompaniyaning mas’ul mansabdor shaxslari ma’muriy javobgarlikka tortilgan. Shuningdek, buyurtmachining texnik nazoratchisiga nisbatan taqdimnoma kiritilib, tegishli ta’sir choralari qo‘llangan», deyiladi bayonotda.
Ta’kidlanishicha, shu bilan choralar cheklanib qolmagan.
«Inspeksiya to‘plagan hujjatlar qoidabuzarliklarga huquqiy baho berish va qonunchilikda belgilangan choralarni ko‘rish uchun huquqni muhofaza qiluvchi organlarga yuborilgan. Aynan mana shu bosqichda jamoatchilikka mazkur xabarlar e’lon qilingan va uning ortidan turli mulohazalar paydo bo‘lgan. Shu nuqtai nazardan, Newport majmuasidagi qurilishlar nazorat organlari tomonidan umuman e’tiborsiz qoldirilgan, degan xulosa holatning barcha jihatlarini to‘liq aks ettirmaydi. Ob’yektdagi qoidabuzarliklar aniqlangan, buyurtmachiga majburiy ko‘rsatmalar berilgan, mas’ul shaxslar javobgarlikka tortilgan va materiallar huquqni muhofaza qiluvchi organlarga taqdim etilgan», deyiladi bayonotda.
