Toshkent shahar hokimligi poytaxt ko‘chalarida dizayn-kodni joriy etish jarayonida tadbirkorlar tomonidan bildirilgan fikr va e’tirozlar inobatga olinganini ma’lum qildi.

Xususan, shahar ko‘chalari qiyofasidagi o‘zgarishlarni yoritish va biznes vakillariga dizayn-kod talablarini tushuntirish bo‘yicha avvalgi yondashuv qayta ko‘rib chiqilgan. Bunda tadbirkorlar manfaatlari ustuvor ahamiyat kasb etishi ta’kidlandi.

Ma’lumotlarga ko‘ra, joriy yilning 11-mayidan 26-iyuliga qadar dizayn-kodni joriy etish ishlari Toshkentning 56 ta ko‘chasidagi 3 228 ta tadbirkorlik sub’yektini qamrab olgan.

Jarayon bevosita ta’sir ko‘rsatgan tadbirkorlarning fikrini o‘rganish maqsadida Toshkent shahar hokimligi Savdo-sanoat palatasining hududiy boshqarmasi bilan hamkorlikda so‘rov o‘tkazgan.

So‘rov natijalari ayrim hollarda tadbirkorlarga dizayn-kod talablari, zarur hujjatlarni rasmiylashtirish tartibi va bajarilishi lozim bo‘lgan ishlar ketma-ketligi o‘z vaqtida hamda yetarlicha tushunarli tarzda yetkazilmaganini ko‘rsatgan.

Hokimlik mazkur e’tirozlarni o‘rinli deb topgan va ular keyingi ishlarni tashkil etishda inobatga olinishini bildirgan.

509 ta fasad yangilandi

Hozirga qadar 509 nafar tadbirkor o‘z binosi fasadini yangilagan, yana 2 627 nafar tadbirkor esa bu yo‘nalishdagi ishlarni yakunlamoqda.

Qolgan masalalar tuman hokimliklari va mutasaddi tashkilotlar ishtirokida har bir tadbirkor bilan individual tartibda ko‘rib chiqilishi belgilangan.

Shuningdek, dizayn-kod talablarini amaliyotga to‘g‘ri tatbiq etish maqsadida reklama sohasi mutaxassislarining malakasini oshirish choralari ham ko‘rilgan.

«Toshkent Invest Kompaniyasi» AJ, Raqobatni rivojlantirish va iste’molchilar huquqlarini himoya qilish qo‘mitasi hamda Toshkent shahar hokimligi huzuridagi Raqamli rivojlanish departamenti ekspertlari ishtirokida 18 ta reklama-ishlab chiqarish kompaniyasi mutaxassislari uchun malaka oshirish ishlari tashkil etilgan.

Toshkent shahar hokimligiga ko‘ra, dizayn-koddan ko‘zlangan maqsad faqat binolar fasadini yagona talablarga moslashtirish emas. Jarayon tadbirkorlar uchun tushunarli va adolatli bo‘lishi hamda biznesga asossiz qiyinchiliklar keltirib chiqarmasdan poytaxt qiyofasini yaxshilashga xizmat qilishi kerak.

Xatolar tan olindimi? Peshlavha mashmashasi bo‘yicha tomonlar muloqoti