Audi kompaniyasi A2 nomini qayta jonlantirdi – bu safar xetchbek unsurlariga ega ixcham elektr krossoveri koʻrinishida. Yangi model oʻzidan oldingi avtomobilning oʻziga xos jihatlarini – burchaksimon kuzov va ikki qismli orqa oynani saqlab qolgan.
Audi A2 modeli 2000-yildan 2007-yilgacha ishlab chiqarilgan. Bu kam quvvatli benzin va dizel dvigatellari (hajmi 1,2 dan 1,4 litrgacha) hamda faqat old gʻildiraklari tortadigan xetchbek edi.
Audi kompaniyasi A2 e–tron brend tarixidagi eng samarali seriyali avtomobil ekanini taʼkidlamoqda. Optimal komplektatsiyada energiya sarfi 100 km uchun 12,8 kVt⋅soatni tashkil etadi, maksimal yurish masofasi esa WLTP sikli boʻyicha 645 km ga yetadi.
Muhandislar bunga faqat ulkan batareya oʻrnatish orqaligina erishmadi. Avtomobilning aerodinamik qarshilik koeffitsiyenti – 0,24. Bunday koʻrsatkichga yopiq tub, havo olgichning faol toʻsigʻi, aerodinamik gʻildirak disklari va gʻildirak arkalaridagi turbulentlikni soʻndiruvchi unsurlar yordamida erishilgan.
Hatto eshik tutqichlari ham samaradorlik uchun kurashga hissa qoʻshadi. Bular ustunlar asosidagi buriluvchi mexanizmlar boʻlib, ular yengil tortilganda eshikni mexanik tortqisiz, elektr uzatma yordamida ochadi. Audi elektr tizimi ishdan chiqqan holatlar uchun zaxira energiya manbaiga ega.
A2 e–tron faqat orqa gʻildiraklar yordamida harakatlanadi, hech qanday Quattro tizimi yoʻq. Uch xil batareya va toʻrt xil quvvat darajasi mavjud:
- 52 kVt⋅soat, 168 ot kuchi – 100 km/soat tezlikka 8,8 soniyada erishadi, yurish masofasi – 422 km;
- 61 kVt⋅soat, 187 ot kuchi – yuzlikka 7,9 soniyada chiqadi, yurish masofasi – 515 km;
- 84 kVt⋅soat, 228 ot kuchi – 7 soniya, 645 km;
- 84 kVt⋅soat, 322 ot kuchi – 5,7 soniya, 629 km, maksimal tezlik – 200 km/soat (qolganlariniki 160 km/soat bilan cheklangan).
Katta batareyali avtomobillarda oʻzgarmas tok bilan tezkor quvvatlash funksiyasi qoʻllab-quvvatlanadi – quvvati 183 kVt gacha boʻlib, 10% dan 80% gacha 29 daqiqada toʻladi. Kichikroq batareyalar quvvati 100 kVt bilan cheklangan, biroq sigʻimi kamligi tufayli 24 daqiqada toʻladi.
