Sirdaryoda «oʻlik jonlar» orqali 1 mlrd soʻm byudjet mablagʻi talon-toroj qilindi. Fargʻonada hamshira 4 kishini pichoqladi, biri vafot etdi. Toshkent–Andijon yoʻnalishida tezyurar poyezd qatnovi boshlanadi. Tadbirkorlarga savdo avtomatlarini oʻrnatish huquqi berilishi mumkin. Kunning muhim yangiliklari bilan tanishtiramiz.
Toshkent–Andijon yoʻnalishida tezyurar poyezd qatnovi boshlanadi
10-sentabrdan Toshkent – Andijon – Toshkent yoʻnalishidagi amaldagi poyezd tarkibi oʻrniga zamonaviy tezyurar CRRC-Dalian elektropoyezdi qatnovi yoʻlga qoʻyiladi.
Poyezd 4 ta ekonom klassda jami 357 oʻrindiqqa ega va Toshkentdan soat 9:20 da yoʻlga chiqib, soat 13:35 da Andijonga yetib boradi. Qaytishda soat 15:38 da yoʻlga chiqib, 19:53 da Toshkentga yetib keladi.
Tadbirkorlarga savdo avtomatlarini oʻrnatish huquqi berilishi mumkin
Oʻzbekistonda soliq maʼmurchiligini takomillashtirishga qaratilgan qonun va Vazirlar Mahkamasi qarori loyihasi ishlab chiqiladi.
Loyihada quyidagilar nazarda tutiladi:
- soliqning belgilangan muddatda toʻlanmagan qismiga hisoblanadigan penya toʻlanmagan soliq summasidan oshib ketmasligini belgilash;
- yakka tartibdagi tadbirkorlarga savdo avtomatlarini oʻrnatish va elektron savdoda buyurtmalarni topshirish punktlarini ochish huquqini berish;
- fiskal chek shakllantiriladigan raqamli platformalar orqali faoliyat yuritayotgan yakka tartibdagi tadbirkorlar va oʻzini oʻzi band qilgan shaxslarni nazorat-kassa texnikasidan foydalanish majburiyatidan ozod etish;
Qonun va hukumat qarori loyihasi 2026-yil noyabr oyida tayyor boʻlishi kerak.
Sirdaryoda «oʻlik jonlar» orqali 1 mlrd soʻm byudjet mablagʻi talon-toroj qilindi
Bosh prokuratura huzuridagi departamentning Sirdaryo viloyati boshqarmasi tomonidan tergovga qadar tekshiruv oʻtkazilganida Guliston shahar obodonlashtirish boshqarmasi masʼul shaxslari ayrim fuqarolarni ishchi sifatida rasmiylashtirgani, biroq ular amalda boshqarmada ishlamagani aniqlangan.
Shunga qaramay, mazkur fuqarolar nomiga jami 1 mlrd soʻm miqdorida ish haqi hisoblangan. Tergovga qadar tekshiruv maʼlumotlariga koʻra, ushbu mablagʻlar masʼul shaxslar tomonidan oʻz ehtiyojlari uchun sarflanib, byudjet mablagʻlari oʻzlashtirish yoki rastrata yoʻli bilan talon-toroj qilingan.
Mazkur holat yuzasidan Jinoyat kodeksining 167-moddasi - oʻzlashtirish yoki rastrata yoʻli bilan talon-toroj qilish alomatlari bilan jinoyat ishi qoʻzgʻatilgan.
Toshkentda uy-joylarning yangi qiymati soliq yukini oshirmasligi aytildi
Toshkent shahrida tajriba tariqasida oʻtkazilgan koʻchmas mulkni ommaviy baholashning dastlabki natijalari jamoatchilik muhokamasiga qoʻyildi. Mulkdorlar baholash natijasi bilan MyGov portalidagi tegishli xizmat orqali tanishishi va baholash natijasiga roziligi yoki rozi emasligini bildirishi mumkin.
Dastlabki hisob-kitoblarga koʻra, poytaxtdagi qariyb 600 mingta kvartiraning umumiy qiymati 426,7 trln soʻm deb baholangan. Bu obyektlarning amaldagi kadastr qiymati esa qariyb 57,7 trln soʻmni tashkil etadi. Oʻrtadagi farq – 7,3 barobarni tashkil etmoqda.
Baholash natijalariga bagʻishlangan matbuot anjumanida Fiskal tahlillar instituti direktori oʻrinbosari Dilshod Sultonovning aytishicha, ommaviy baholash natijasida koʻchmas mulkning qiymati oshgani – soliq yukining avtomatik ravishda shuncha miqdorda oshishini anglatmaydi.
Fargʻonada hamshira 4 kishini pichoqladi, biri vafot etdi
Fargʻona viloyati, Qoʻshtepa tumanida hamshira 4 kishini pichoqladi. Ulardan biri vafot etdi, yana biri shifoxonada ogʻir ahvolda, ikki nafari oʻrta darajada jarohatlandi.
Holat 7-sentabr kuni tuman tugʻuruqxonasida sodir boʻlgan. Kun.uz’ning aniqlashicha, pichoqlagan shaxs ayol kishi boʻlgan. U hamshiralarni xonaga qamab olgan holda pichoqlagani aytilmoqda. Ayol nega bunday qilgani va ishning boshqa tafsilotlari hozircha maʼlum emas.
Bosh prokuror matbuot kotibi Hayot Shamsutdinov holatni Kun.uz’ga tasdiqladi. Uning bildirishicha, Qoʻshtepa tuman prokuraturasi 7-sentabr kuni holat yuzasidan Jinoyat kodeksining 97-moddasi (qasddan odam oʻldirish) bilan jinoyat ishi qoʻzgʻatgan.
