YUNESKO huzuridagi Oʻzbekistonning doimiy vakili Kamol Muxtorov tashkilotning Butunjahon merosi markazi direktori Lazar Elundu Assomo bilan uchrashdi. Bu haqda “Dunyo” axborot agentligi xabar berdi.
Uchrashuvda Oʻzbekistonning madaniy meros obyektlarini himoya qilish va asrab-avaylash sohasidagi hamkorlikni kengaytirish, shuningdek, yangi qoʻshma tashabbuslarni amalga oshirish masalalari koʻrib chiqildi.
Muloqotda Buxorodagi “Poi Kalon” meʼmoriy majmuasini restavratsiya qilish hamda “Shahriston” hududida ochiq osmon ostidagi arxeologik muzey yaratish rejalariga alohida eʼtibor qaratildi.
Shuningdek, joriy yilning may–iyun oylarida Buxoroda ish olib borgan xalqaro ekspertlar missiyalari natijalari muhokama qilinib, mazkur loyihalarni amalga oshirish boʻyicha navbatdagi qadamlar koʻrib chiqildi.
Butunjahon merosi markazi direktori Lazar Elundu Assomo 26-iyul kuni Pusanda oʻtkazilgan Butunjahon merosi qoʻmitasining 48-sessiyasida Toshkentdagi modernistik arxitektura obyektlari YuNESKOning Butunjahon merosi roʻyxatiga kiritilganini ham qayd etdi.
U Oʻzbekistonni ushbu voqea bilan yana bir bor tabriklab, bu mamlakatning boy va rang-barang madaniy merosini saqlash borasidagi saʼy-harakatlari xalqaro miqyosda eʼtirof etilayotganidan dalolat berishini taʼkidladi.
