«Boysun doʻppisi» geografik koʻrsatkich sifatida davlat roʻyxatidan oʻtkazildi.
U Boysun tumani hududida qadimdan tikib kelinadigan milliy bosh kiyimlardan biri hisoblanadi. Doʻppi dumaloq shaklda boʻlib, piltadoʻzi uslubidagi kashtalar bilan bezatiladi.
«Boysun doʻppisi» boshqa milliy bosh kiyimlardan oʻziga xos piltadoʻzi kashta uslubi, geometrik naqshlari, yorqin ranglar uygʻunligi va anʼanaviy tikish usullari bilan ajralib turadi.
Uni bezashda chilxol, chayongul, qoʻchqorshoxi, archa va koʻzacha kabi anʼanaviy naqshlardan foydalaniladi.
Doʻppining geografik koʻrsatkich sifatida roʻyxatdan oʻtkazilishi mahsulotning aynan Boysun hududi bilan bogʻliq xususiyatlarini huquqiy jihatdan himoya qilishga xizmat qiladi.
Shuningdek, «Boysun doʻppisi» nomining huquqiy muhofazasi taʼminlanib, uning anʼanaviy xususiyatlari va ishlab chiqarish usullarini saqlab qolish uchun qoʻshimcha huquqiy asos yaratiladi.
Bu Boysun hunarmandchiligi mahsulotini Oʻzbekiston va xalqaro bozorlarda targʻib qilish imkoniyatlarini ham kengaytirishi kutilmoqda.
Maʼlumot uchun, geografik koʻrsatkich - mahsulotning muayyan sifati, obroʻsi yoki boshqa xususiyatlari maʼlum bir geografik hudud bilan bogʻliqligini koʻrsatuvchi intellektual mulk obyekti hisoblanadi.
