15-avgust kuni Surxondaryo viloyati Boysun tumanida joylashgan “Mustaqillikning 25 yilligi” konidagi avariyaviy quduqni yopish bo‘yicha amaliy ishlar rasman boshlandi.
Avvalroq «O‘zbekneftgaz» boshqaruvi raisi Abdug‘ani Sanginov Xitoy Milliy neft korporatsiyasi tarkibidagi CCDC burg‘ulash kompaniyasi vakillari mazkur konda yuzaga kelgan texnogen avariyani bartaraf etish ishlarini jadallashtirish masalasini muhokama qilgandi.
Abdug‘ani Sanginovga ko‘ra, «Mustaqillikning 25 yilligi» konidagi avariya oqibatlarini 2027-yilning birinchi yarmida to‘liq bartaraf etish rejalashtirilgan.
2024-yilning 1 sentyabr kuni Boysun tumani Kofrun shaharchasi tarkibidagi «Ko‘lqamish» MFY hududida joylashgan «Mustaqillikning 25 yilligi» (M-25) gaz koniga qarashli 604-quduqda burg‘ilash ishlari vaqtida vodorod sulfidi (oltingugurt) gazi sizib chiqa boshlagan, 2 sentyabr kuni Kofrun aholisi evakuatsiya qilingan edi.
Ammo konni yopishning imkoni bo‘lmadi, 17 sentyabr kuni navbatdagi avariya ro‘y berib, 4 kishi halok bo‘lib, 11 kishi jarohatlangan.
2025-yil 27-mart kuni konda yana portlash bo‘ldi. Energetika vazirligi tabiatga ziyon yetkazmaslik va havo ifloslanishining oldini olish maqsadida quduq yoqib qo‘yilganini ma’lum qilgan.
24-aprel kuni telegram-kanallarda gaz chiqayotgan 202-quduqning tuynugi o‘z-o‘zidan yopilib qolgani haqida video tarqalgan. 5-may kuni ushbu quduqda takroriy portlash yuz bergan.
Prezident Shavkat Mirziyoyev joriy yil fevralida Surxondaryo viloyati hokimligida bo‘lib o‘tgan yig‘ilishda konda yuz bergan avariya to‘xtatilishini ma’lum qilgandi.
