Ukraina quruqlik qoʻshinlari Uchinchi armiya korpusi qoʻmondonligi ukrain harbiylari Donetsk oblastining shimoliy qismida qarshi hujum amaliyoti oʻtkazayotganini eʼlon qildi. Bu haqda korpus qoʻmondoni, brigada generali Andrey Biletskiy maxsus videomurojaatida eʼlon qildi. Bungacha Z-blogerlar ham Ukraina qurolli kuchlari Liman shahri atrofida yurish qilayotgani haqida xabarlar (1, 2, 3) bergandi.
Ukraina qurolli kuchlari operatsiyaga «Vivaldi» nomini bergan. Biletskiyning maʼlum qilishicha, ushbu yurish doirasida Uchinchi korpus Liman yoʻnalishidagi bir nechta aholi punktlarini – Novoselovka, Aleksandrovka, Yarovaya, Korove Yar atroflarini «infiltratsiyadan tozalagan», shuningdek, Sredneye ozod qilingan. Umuman olganda, Ukraina qurolli kuchlari 75 kilometr kvadrat maydonni tozalagan va yana 10 kilometr kvadrat hududni Rossiya qoʻshinlaridan ozod qilgan, shuningdek, «Rossiya Federatsiyasining 20 va 25-armiyalarining jangovar qobiliyatiga qaqshatqich zarba bergan». Bu maʼlumotni boshqa mustaqil manbalar orqali tasdiqlashning imkoni yoʻq.
Biletskiy operatsiyaning ushbu bosqichida Rossiya qoʻshinlari bir yarim mingga yaqin askar (yaradorlar bilan qoʻshib hisoblangan boʻlishi mumkin), 12 mingdan ortiq dron, yuzlab zirhli texnikalar, artilleriya tizimlari va avtomobil texnikalarini yoʻqotganini aytgan. Shuningdek, uning soʻzlariga koʻra, Ukraina dronlari dushmanning logistika yoʻllarini kesib qoʻygan.
«Ochiq manbalarda hozirda hujum harakatlarimizning pirovard maqsadi – Cherniy Jerebets daryosi qirgʻoqlariga chiqish ekani haqida koʻplab maʼlumotlar bor. Lekin bizning operatsiyamiz „Vivaldi“ deb nomlangan. Vivaldida esa, maʼlumki, toʻrt mavsum bor. Va bu – hali birinchi mavsum», – degan Uchinchi korpus qoʻmondoni.
Biletskiy «axboriy sukunat rejimi»ga rioya etishga chaqirib, rasmiy manbalarda amaliyot boʻyicha hisobot berib borilishini vaʼda qilgan. Ukraina qurolli kuchlarining Donetsk oblastidagi qarshi hujum amaliyoti bir necha oydan buyon davom etmoqda, ammo bungacha bu haqda rasman maʼlum qilinmagandi. Ushbu amaliyotning yakuniy maqsadi ham nomaʼlum.
Liman – RF tomonidan ishgʻol etilgan Donetsk shahridan taxminan yuz kilometr shimoldagi strategik muhim ahamiyatga ega boʻlgan shahar hisoblanadi. Rossiya qoʻshini 2022-yil mayida ushbu shaharni egallab olgandi, ammo Ukraina qurolli kuchlari oʻsha yil oktabridayoq shahar ustidan nazoratni qaytarib olgan. 2026-yil yozi boshida RF qoʻshinlari Limanni yana shturm bilan egallashga harakat qildi, ammo buni uddalay olmadi.
