Oʻzbekiston Musulmonlar idorasi raisi oʻrinbosari, Vaqf xayriya jamoat fondi raisi Zayniddin Eshonqulov boshchiligidagi delegatsiya Malayziyada boʻlib oʻtgan Islomiy iqtisodiyot haftaligi va Jahon vaqf forumida ishtirok etdi.
Oʻzbekiston delegatsiyasi Malayziya parlamenti senatori, Malayziya Vaqf fondi rahbariyati, Butunjahon zakot va vaqf forumi bosh kotibi hamda boshqa rasmiylar bilan uchrashib, soha boʻyicha muzokaralar oʻtkazdi.
Malayziyaning “Nashrul Qurʼon” nashriyoti raisi Abdul Latif Mirasa bilan uchrashuvda hamkorlikni yanada rivojlantirish, oʻzaro tajriba almashish, turli xayriya loyihalarini birgalikda amalga oshirish maqsadida anglashuv memorandumi imzolandi.
“Nashrul Qurʼon” nashriyoti “Vaqf” xayriya jamoat fondi orqali Oʻzbekiston xalqiga 20 ming nusxadagi “Qurʼoni karim va oʻzbek tilidagi maʼnolar tarjimasi” kitobini tuhfa qildi.
Uchrashuvlar chogʻida Butunjahon vaqf forumini joriy yilning noyabr oyida Samarqand shahrida oʻtkazish boʻyicha kelishuvga erishildi. Ushbu xalqaro tadbirga musulmon mamlakatlaridan 300 ga yaqin hukumat rasmiylari va ekspertlarni taklif etish rejalashtirilmoqda.
