Qashqadaryo viloyati Ekologiya boshqarmasining Shoʻrtan neft va gaz qazib chiqarish boshqarmasidan 8,8 mlrd soʻmlik ekologik kompensatsiya undirish boʻyicha daʼvosi sud tomonidan qanoatlantirilmadi. Bu haqda Biznes-ombudsman axborot xizmati xabar berdi.

Sud muhokamasida nazorat qiluvchi organ tekshiruv predmetidan tashqariga chiqqan, shuningdek, daʼvoning asosiy qismi boʻyicha hisob-kitoblar yetarli dalillar bilan tasdiqlanmagan, deb topilgan. Shuningdek, qonunni buzgan holda olingan dalillardan foydalanishga yoʻl qoʻyilmasligi ham inobatga olingan.

Yakunda sud 8,8 mlrd soʻmlik daʼvoning asosiy qismini rad etgan. Hal qiluv qaroriga koʻra, faqat 676 ming 133 soʻm kompensatsiya toʻlovi undirilishi belgilangan.