2027-yil 1-yanvargacha pensiya taʼminotiga oid xizmatlar toʻliq interaktiv va proaktiv shaklga oʻtkaziladi. Bu haqda «Davlat pensiya taʼminotiga oid zamonaviy xizmatlarni joriy etishning qoʻshimcha chora-tadbirlari toʻgʻrisida» prezident qarori qabul qilindi.
Qarorga koʻra, pensiya taʼminotiga oid ayrim xizmatlar fuqarolarning alohida murojaatisiz proaktiv shaklda koʻrsatiladi. Xususan, 2026-yil 1-noyabrdan ishlar hajmining qisqarishi yoki korxonaning tugatilishi sababli ishsiz deb topilgan shaxslarga umumiy belgilangan yoshdan ikki yil avval yoshga doir pensiya tayinlanadi. Keyingi yil 1-yanvardan boshlab esa boquvchisini yoʻqotganlik pensiyasini tayinlash ham proaktiv shaklda amalga oshiriladi.
Shuningdek, 2027-yildan «Mening pensiyam» onlayn xizmati orqali pensiya yoshiga bir yil qolgan fuqarolarni oldindan xabardor qilish imkoniyati yaratiladi. Fuqarolar ularga imtiyozli shartlarda pensiya tayinlash, pensiyalarni qayta hisoblash va pensiyani boshqa turiga oʻzgartirish uchun Davlat xizmatlari markazlari yoki my.gov.uz portali orqali onlayn murojaat qilishlari mumkin boʻladi.
2027-yil 1-yanvardan boshlab Pensiya jamgʻarmasi tomonidan fuqarolardan qogʻoz shaklidagi hujjatlar hamda maʼlumotlarni qabul qilish amaliyoti bekor qilinadi.
2026-yil 1-dekabrdan boshlab fuqarolar «Fuqarolarning davlat pensiya taʼminoti toʻgʻrisida»gi qonunga muvofiq pensiyaning boshqa turiga oʻtkazish uchun murojaat qilishi mumkin. Agar tayinlanadigan yangi pensiya miqdori fuqaro olayotgan pensiyadan kam boʻlsa, avvalgi pensiya turi oʻzgarishsiz qoldiriladi.
Shuningdek, ish staji va ish haqi toʻgʻrisida arxiv yoki tashkilotlar tomonidan taqdim etilgan qoʻshimcha elektron maʼlumotlarga asosan pensiya miqdorini qayta hisoblash uchun murojaat qilish mumkin boʻladi.
2027-yil 1-yanvardan boshlab pensiya toʻlovini naqd pul shakliga oʻtkazish va toʻxtatib turilgan pensiya toʻlovlarini tiklash boʻyicha murojaat qilish mumkin boʻladi. Fuqarolar sudning hal qiluv qarorlari, ajrimlari, qarorlari va hukmlari, ijro hujjatlari hamda boshqa qarorlar asosida pensiya miqdoridan chegirma qilingani toʻgʻrisida, hisoblangan pensiya va ixtiyoriy ravishda ijtimoiy soliq toʻlangani haqida maʼlumot olishi mumkin.
Yashash manzili oʻzgargani munosabati bilan pensiyaga oid hujjatlar yigʻmajildini hisobga qoʻyish ham elektron shaklda amalga oshiriladi.
Eslatib oʻtamiz, 2028-yildan pensiya yoshini har yili 3 oyga oshirish taklif etilyapti. 2039-yilga borib u erkaklar uchun 63, ayollar uchun 58 yoshga yetkaziladi. Shuningdek, pensiya tayinlash uchun eng kam ish staji 2034-yilda 15 yilgacha oshirilishi koʻzda tutilgan.
