Reuters agentligiga koʻra, 5-oktabr kuni hukumat kuchlari Saudiya Arabistonining havodan koʻmagi bilan Bob al-Mandab boʻgʻozi atrofidagi sohil hududlarida hujumga oʻtgan. Hukumat manbalari qoʻshinlar Moxa shahri chekkasiga yetib borganini aytgan, keyinroq Yaman Mudofaa vazirligi shahar nazoratga olinganini eʼlon qilgan. Bu maʼlumotning mustaqil tasdigʻi keltirilmagan.
Husiychilar Moxani sentabrda egallagan edi. Qizil dengizdan Bob al-Mandab boʻgʻoziga olib boruvchi yoʻlda joylashgan ushbu port atrofidagi nazorat dengiz qatnovi uchun muhim ahamiyatga ega.
Yaman Prezidentlik rahbarlik kengashi raisi Rashad al-Alimiy 4-oktabr kuni «Ansorulloh» harakatiga qarshi yirik harbiy operatsiya boshlanganini maʼlum qilgan. Uning soʻzlariga koʻra, maqsad mamlakatning barcha hududlarini xalqaro tan olingan hukumat nazoratiga qaytarishdan iborat.
Husiychilar Yamanning katta qismini, jumladan, aholi zich yashaydigan hududlar va poytaxt Sanoni nazorat qilib kelmoqda. Sentabr oxirida hukumat umumiy safarbarlik eʼlon qilib, oʻz tomoniga oʻtadigan «Ansorulloh» aʼzolariga amnistiya vaʼda qilgan.
Ayni paytda husiychilar ham jang maydonida muvaffaqiyatga erishganini bildirmoqda. Yemen Press Agency guruh vakiliga tayanib, Taiz viloyatidagi tumanlardan biri hamda Rashad al-Alimiyning hududdagi sobiq qarorgohi egallangani haqida xabar bergan.
Husiychilarga qarashli Al Masirah telekanali al-Alimiyning uyi egallangani aytilgan videolarni namoyish etgan. Tasvirlarda qurollangan shaxslar bino ustiga guruh bayrogʻini oʻrnatgani koʻrinadi.
Husiychilarning harbiy vakili Yahyo Saria Saudiya Arabistonida ham qator operatsiyalar oʻtkazilganini daʼvo qilgan. Uning aytishicha, Ar-Riyoddagi Qirol Xolid xalqaro aeroporti, Rabigʻ shahridagi Aramco neftni qayta ishlash zavodi va bir qator harbiy obyektlarga hujum qilingan. Reuters bu daʼvolarni mustaqil tekshira olmaganini, Saudiya Arabistoni va Aramco esa izoh soʻroviga darhol javob bermaganini qayd etgan.
Vaziyat keskinlashishi ortidan Saudiya Arabistoni, Turkiya va Pokiston Ar-Riyodda favqulodda uchrashuv oʻtkazgan. Qoʻshma bayonotga koʻra, tomonlar Makka mudofaa kelishuvi doirasida Saudiya Arabistoni hududiga harbiy kuchlar va vositalarni tezkor joylashtirishga kelishib olgan.
Avgustda imzolangan kelishuv uch davlatdan biriga qurolli hujumni barchasiga qilingan hujum deb baholashni nazarda tutadi.
