DW xabariga koʻra, 13-oktabrga oʻtar kechasi Rossiya Ukrainaga yana keng koʻlamli zarba bergan. Xarkiv meri Igor Terexov shaharda 3 kishi halok boʻlgani va yana 11 kishi jarohatlanganini maʼlum qilgan.
Ukraina Favqulodda vaziyatlar davlat xizmatiga koʻra, zarbalar Xarkivning Xolodnogorsk va Shevchenko tumanlaridagi turarjoy mavzelari hamda fuqarolik infratuzilmasi obyektlariga toʻgʻri kelgan.
Raketalardan biri toʻrt qavatli uyga urilib, uning bir podyezdini butunlay vayron qilgan. Vayronalar ostida odamlar boʻlishi mumkinligi sababli qutqaruv ishlari davom etmoqda.
12-oktabr oqshomida Rossiya qoʻshinlari Kiyevga ham ballistik raketalar va dronlar bilan hujum qilgan.
Shahar meri Vitaliy Klichkoning maʼlum qilishicha, Darnitsa tumanida dron 25 qavatli uyning 12–16-qavatlari oraligʻiga urilgan. Hujum oqibatida 2 kishi halok boʻlgan, yana 11 kishi jarohatlangan.
Kiyev shahar prokuraturasiga koʻra, halok boʻlganlar - 59 yoshli ayol va hujumga uchragan koʻp qavatli uy yonidagi avtomobilda boʻlgan yana bir kishi.
Kiyevga ballistik raketalar bilan takroriy zarba ham berilgan. Ukraina Qurolli kuchlari Havo kuchlari Rossiya hududidan raketalar uchirilgani haqidagi maʼlumot oʻz vaqtida kelib tushmagani sababli havo hujumi xavfini oldindan eʼlon qila olmaganini bildirgan.
Harbiylarning maʼlum qilishicha, ballistik nishonlar radarlar orqali bevosita Kiyevga hujum vaqtida aniqlangan. Hodisa sabablari oʻrganilmoqda.
