«Dunyo» axborot agentligining Belarus OAVga tayanib xabar berishicha, tajriba Vitebsk tumanidagi «Olgovskoye» ishlab chiqarish kooperativi dalalarida oʻtkazilmoqda. Bu xoʻjalikda Oʻzbekistondan olib kelingan mazkur nav ilk bor ekilmoqda.
Sarimsoqpiyoz uchun unumdor va yumshoq tuproqli yer tanlangan. Ekish jarayonini oʻzbek agronomlari mahalliy mutaxassislar bilan birgalikda nazorat qilmoqda.
Ishlarda Andijon viloyatida faoliyat yurituvchi «Texmash» qoʻshma korxonasining maxsus ekish texnikalaridan foydalanilmoqda.
Mutaxassislar Belarus iqlimida qaysi ekish usuli yuqori hosil berishini aniqlamoqchi. Shu maqsadda 75 santimetrli ikki qatorli va 40 santimetrli uch qatorli ekish sxemalari sinovdan oʻtkazilmoqda.
«Olgovskoye» kooperativi bosh agronomi Olga Yakovlevaning aytishicha, ekilgan sarimsoqpiyozning rivojlanishi doimiy kuzatib boriladi. Birinchi hosilni kelasi yil iyulida olish moʻljallangan.
Shu mavsumda L. Dovator nomidagi Ulla davlat kolleji dalalarida ham Oʻzbekiston sarimsoqpiyozini ekish koʻzda tutilgan.
Agentlik Vitebsk viloyati bilan Oʻzbekiston hududlari, xususan, Andijon oʻrtasida qishloq xoʻjaligi hamkorligi faollashayotganini qayd etgan. Avvalroq Vitebsk viloyatida oʻzbek fermerlariga kartoshka yetishtirish uchun 2 ming gektar yer ajratilgani va chorvachilik boʻyicha qoʻshma loyihalar boshlangani xabar qilingan edi.
