Aleksandr Lukashenko 11-sentabr kuni Brest viloyatidagi «Obuz-Lesnovskiy» umumqoʻshin poligonida jurnalistlar bilan muloqot chogʻida armiyadagi tekshiruvlar haqida gapirdi. Uning soʻzlarini BelTA davlat agentligi keltirgan.
Lukashenkoning aytishicha, Belarus Qurolli kuchlarining barcha boʻlinmalari bosqichma-bosqich tekshiriladi va jarayon safarbarlik tayyorgarligigacha yetib boradi.
«Men avval ham oddiy qilib aytganman: armiyani silkitish kerak, vaqti keldi. Butun armiyani. Hammani, hatto safarbarlikkacha tekshiramiz», - dedi u.
Belarus rahbarining maʼlum qilishicha, tank va motoʻqchi boʻlinmalarda tekshiruvlar allaqachon oʻtkazilgan. Ayni paytda artilleriya brigadasida shunday tadbirlar davom etmoqda.
«Urush boʻlmasligi uchun urushga tayyorgarlik koʻryapmiz», - dedi Lukashenko.
U barcha Qurolli kuchlar tekshiruvdan oʻtkazilishini taʼkidlab, harbiy tayyorgarlik sharoitlari imkon qadar haqiqiy jang holatiga yaqinlashtirilishi kerakligini aytdi.
Lukashenko bu yondashuvni Rossiya rasmiylari «maxsus harbiy operatsiya» deb ataydigan Ukrainadagi urushdan chiqarilgan saboqlar bilan izohladi.
«Hammasi xuddi jangdagidek boʻlishi kerak. Qoʻshinlarimizni shunday tayyorlash zarur. Bu - maxsus harbiy operatsiya saboqlari. Shuning uchun butun Qurolli kuchlarni silkitamiz», - dedi u.
Lukashenkoning oʻgʻli ham armiyada xizmat qilmoqda
Lukashenko suhbat davomida 22 yoshli kichik oʻgʻli Nikolay armiyada xizmat qilayotganini ham maʼlum qildi.
Nikolay Lukashenko yozda Pekin universiteti va Belarus davlat universitetining «Biotexnologiya» qoʻshma dasturi boʻyicha diplom olgan.
Lukashenkoning soʻzlariga koʻra, uning oʻgʻli boshqalar qatori harbiy xizmatga chaqirilgan va hozir leytenant sifatida xizmat qilmoqda.
«Hatto hech kim bilmasdi. Viktor [mudofaa vaziri Viktor Xrenin] chaqirdi. Armiyada hamma qatori xizmat qilyapti. Leytenant. Qayerdaligini aytmayman, ammo eng murakkab boʻlinmada», - dedi Lukashenko.
Uning qoʻshimcha qilishicha, Nikolay xizmatdan boʻsh vaqtida biotexnologiya sohasidagi oʻqishlarini ham davom ettirmoqda.
