Urganch tumanidagi «Hayot yo‘q mahalla» - elektr ta'minotidagi muammolar hal bo‘ldi, yo‘llar qachon ta'mirlanadi?

Shu yilning fevral oyida Kun.uz tahririyatiga Xorazm viloyati Urganch tumani G‘alaba mahallasining Amudaryo ko‘chasida yashovchi aholi ijtimoiy muammolar yechimsiz qolayotganidan shikoyat qilishgan edi.

Murojaatda mahalla yo‘llarining juda yomonligi, elektr energiyasi ta'minotidagi tez-tez uzilishlar, elektr simyog‘ochlarining yo‘qligi, ichimlik suvi tarmog‘idagi muammolar, maishiy chiqindilarning to‘planib qolayotgani kabi muammolar qayd etilgandi.

Murojaat asosida mahallaga borib, vaziyatni o‘rgandik, aholi bilan suhbatlashib, shikoyatning o‘rinli ekanini aniqladik. Bu haqda «Hayot yo‘q mahalla!» - Urganch tumanidagi «dunyodan uzilgan» mahalla muammolari nomli va «Hayot yo‘q mahalla 2» - Urganch tumanidagi «dunyodan uzilgan» mahalla muammolari hal bo‘lmadi» nomli maqolalarni e'lon qildik. Bu bilan Urganch tumani hokimligi va boshqa mutasaddi tashkilotlarning Amudaryo ko‘chasi aholisining shikoyatiga e'tibor qaratishi, muammolarni bartaraf qilishda yordam berishini kutgan edik.

Maqolada mahalla ko‘chalarida elektr energiyasi simyog‘ochlari yo‘qligi, aholining o‘zi qo‘lbola simyog‘ochlarni yasab, bir amallab o‘rnatib olishgani, qattiq shamol bo‘lsa, simyog‘ochlar sinib, simlar uzilib, odamlarning, ko‘chada yurgan bolalarning ustiga tushmasligiga, biror falokat yuz bermasligiga hech kim kafolat berolmasligi, odamlar shunday xavfli sharoitda yashayotgani, bundan tashqari, mahallada o‘rnatilgan transformator juda eskiligi tufayli, yomg‘ir yoki qor yog‘sa, ichiga suv kirib, 2-3 kunlab elektr energiyasidan uzilib qolishi kabi muammolar yoritilgan edi.

So‘nggi tanqidiy maqola chiqqanidan so‘ng, «Urganch tumani hududiy elektr tarmoqlari MChJ» tomonidan kamchiliklar, muammolar bartaraf qilindi.

Xususan, yog‘ochdan yasalgan va qo‘lbola usulda o‘rnatilgan simyog‘ochlar olib tashlanib, o‘rniga zamonaviylari o‘rnatildi.

Mahallaga yangi transformator o‘rnatilib, elektr ta'minoti tarmog‘iga ulab berildi.

Bundan tashqari aholining uylari yangi, zamonaviy SIP («Samonesushchiy izolirovannyy provod») simlari orqali elektr tarmog‘iga ulandi. Bu simlar havodan emas, balki uylarning fasadidan o‘tkaziladi, elektr energiyasidagi yo‘qotishlarni ancha kamaytiradi, shuningdek, tarmoqqa noqonuniy ulanib olish imkoniyatini yo‘qqa chiqaradi.

«Urganch tumani hududiy elektr tarmoqlari MChJ» o‘z vazifasini bajarib, kamchiliklarni bartaraf etib, aholining muammolarini hal qildi.

Ammo Avtomobil yo‘llari qo‘mitasi haqida bunday deyolmaymiz. Amudaryo mahallasida yo‘l yo‘q desa ham bo‘ladi. Agar tuproq tortilgan, yozda chang-to‘zon bo‘lib yotadigan, qishda botqoqqa aylanadigan so‘qmoqlarni yo‘l deb hisoblash mumkin bo‘lsa, bor. Mahalla yo‘llari aynan shunday.

Bizdagi ma'lumotlarga qaraganda, Xorazm viloyati hokimligi aholining murojaati asosida yo‘llarni ta'mirlashga har oyda 5 milliard so‘m mablag‘ ajratmoqda. Avtomobil yo‘llari qo‘mitasi Xorazm viloyati hududiy boshqarmasi esa Amudaryo ko‘chasidagi yo‘l bilan bog‘liq muammolarni iyul oyidayoq hal qilishga va'da berilgan edi.

Afsuski avgust oyi kelgan bo‘lishiga qaramasdan, mahallada yo‘llarni ta'mirlash bo‘yicha ko‘zga ko‘rinarli ishlar qilinmagan.

Urganch tumani G‘alaba mahallasidagi Amudaryo ko‘chasida 200dan ortiq xonadonda 1500dan ortiq aholi istiqomat qiladi. Mahallani viloyat markazi Urganch shahridan 3 kilometr masofa, Navro‘z shaharchasidan esa atigi bitta zaxkash ajratib turadi. Mahalliy taksi haydovchilari orasida u «hayot yo‘q mahalla», ya'ni «dunyodan uzilgan mahalla» nomi bilan mashhur. Mahalladagi ijtimoiy sharoitlardan kelib chiqadigan bo‘lsak, hozircha bu nom o‘zini to‘liq oqlayapti.

Nurmuhammad Said