Xorazmda daraxtga borib urilgan Nexia haydovchisi halok bo‘ldi

Urganch tumanida inson o‘limi bilan bog‘liq YTH sodir bo‘ldi. Bu haqda Kun.uz manbasi xabar berdi.

Ma’lum bo‘lishicha, YTH 6 yanvar kuni ertalab Urganch tumani Beruniy mahallasi hududida sodir bo‘lgan. 1992 yilda tug‘ilgan R.B. Nexia mashinasini boshqarib borayotib, bir yo‘nalishda harakatlanib ketayotgan, 24 yoshli M.P. boshqaruvidagi Lacetti bilan to‘qnashgan. To‘qnashuvdan so‘ng Nexia yo‘ldan chiqib ketib, daraxtga borib urilgan.

YTH oqibatida R.B. voqea joyida halok bo‘lgan. Mashinada yo‘lovchi sifatida ketayotgan uning otasi O.B. esa tan jarohati olib, shifoxonaga yotqizilgan.

Dastlabki ma’lumotlarga ko‘ra, YTHga Nexia haydovchisi tezlikni me’yoridan oshirgani sabab bo‘lgan.

Avvalroq Navoiyda 47 nafar yo‘lovchini olib ketayotgan avtobus YTHga uchrab, 2 kishi vafot etgandi.